„არ ვაპირებთ ვიყოთ ინერტულები, რადგან რეფორმის მოლოდინშია სახელმწიფოს მიერ გატარებული პოლიტიკით შეურაცხყოფილი ასიათასობით ადამიანი, როგორც საპატიმროებში, ისე მის გარეთ" - „თეთრი ხმაურის მოძრაობა" იუსტიციის მინისტრ თეა წულუკიანის მიერ 16 ოქტომბერს ჩანიშნული უწყებათაშორისი საკოორდინაციო საბჭოს სხდომის გაუქმებას განცხადებით ეხმაურება.
„ქართული ოცნების" ნარკოპოლიტიკა - რა გაკეთდა 4 წლის განმავლობაში
„ხელისუფლებას ჰქონდა შესაძლებლობა ეს უმნიშვნელოვანესი შეხვედრა რეალურ სამუშაო ფორმატში ჩაეტარებინა, შეხვედრამდე რამდენიმე დღით ადრე კი მოვლენები ასე განვითარდა:
░ ბიუროკრატიული საბაბით (დარბაზში ორი ადგილი ვერ გამოინახა) საბჭომ პროცესების მიღმა დატოვა მომხმარებელთა სათემო ორგანიზაციები.
░ შეხვედრამდე ოთხი დღით ადრე კი, მინისტრმა რეფორმის მთავარი კომოპონენტის (მოხმარების დეკრიმინალიზაცია) საწინააღმდეგო განცხადება გააკეთა, რითაც ბუნუბრავად გამოიწვია საზოგადოების უმწვავესი რეაქცია, ხოლო მოგვიანებით სხდომის გაუქმება აღელვებულ საზოგადოებას გადააბრალა.
შევახსენებთ ხელისუფლებას, რომ საზოგადოება წლების განმავლობაში ითმენს ნარკოპოლიტიკის სახელით უდანაშაულო ხალხის ჩაგვრას და საკმარისზე დიდხანს იყო მშვიდად. მღელვარება აღარ ჩაცხრება! არ ვაპირებთ ვიყოთ ინერტულები, რადგან რეფორმის მოლოდინშია სახელმწიფოს მიერ გატარებული პოლიტიკით შეურაცხყოფილი ასიათასობით ადამიანი, როგორც საპატიმროებში, ისე მის გარეთ" - ნათქვამია მოძრაობის განცხადებაში.
დღეს თეა წულუკიანმა განაცხადა, რომ სხდომა აღარ ჩატარდება, სანამ „სიტუაცია არ დაუბრუნდება მშვიდ მდგომარეობას და ყველა არ გავიაზრებთ იმას, რომ დეკრიმინალიზაციამდე გზა გადის ლიბერალიზაციაზე".
მინისტრის განცხადებით, ის ყველა დაინტერესებულ მხარეს მოუწოდებს, რომ შეცვალოს მიდგომა, რომელიც გულისხმობს: „ვინ ჰკითხავს პოლიციელს, ვინ ჰკითხავს პროკურორს, ვინ ჰკითხავს მოსამართლეს, ვინ ჰკითხავს ზოგიერთ დეპუტატს, რომელიც არ არის დეკრიმინალიზაციის მომხრე, რადგან მათ ყველას ეკითხება აზრი, ყველა მინისტრსა და პრემიერს ეკითხება აზრი და ეს არის სწორედ უწყებათაშორისი საბჭოს ფუნქცია".
