პარლამენტის თავმჯდომარე ირაკლი კობახიძე არ გამორიცხავს საკანონმდებლო ცვლილებებს, რომელიც საარჩევნო უბნის გარკვეულ რადიუსში აქტივისტების ყოფნას აკრძალავს.
„თავის დროზე საარჩევნო კოდექსში იყო რეგულაცია, რომლის თანახმადაც, განსაზღვრული იყო რადიუსი საარჩევნო უბნის გარშემო, სადაც არ შეეძლოთ დგომა ადამიანებს. ეს რეგულაცია გაუქმდა 2010 წელს. თუ არის საჭირო ცვლილებები კანონმდებლობაში, შეგვიძლია ვიმსჯელოთ. მე პირადად არ მომწონს ის პრაქტიკა, რომელიც ჩამოყალიბებულია საქართველოში ათწლეულების მანძილზე, თუმცა აქ არის პარტიების ინტერესი, რომ პრაქტიკა არ შეიცვალოს. მხოლოდ „ქართული ოცნების" აქტივისტები არ დგანან ხოლმე საარჩევნო უბნების გარშემო. ყველასთან ერთად ჩვენ შეგვიძლია ვიმსჯელოთ და საბოლოოდ მივიღოთ გადაწყვეტილება იმასთან დაკავშირებით, როგორი რეგულაციებით გაიმართება უკეთესი არჩევნები", - განაცხადა კობახიძემ.
კობახიძის თქმით, „ქართული ოცნების" კოორდინატორების ქმედება კანონის ფარგლებში იყო.
„აქტივისტები ახორციელებდნენ ამომრჩევლების მობილიზებას. ეს არის ჩვეულებრივი მოვლენა, როგორც საქართველოში, ისე ნებისმიერ ქვეყანაში. მთავარია, რომ ამ დროს არ იყოს გამოყენებული არასამართლებრივი ფორმები. მკაცრად იყო გაფრთხილებული თითოეული აქტივისტი იმასთან დაკავშირებით, რომ ბოროტად არ გამოეყენებინათ თავიანთი სადამკვირვებლო უფლებამოსილებები, მათ შორის, არავითარ შემთხვევაში არ უნდა მოეხდინათ პირადი ნომრების და მსგავსი ინფორმაციის აღნუსხვა. ასეთ ფაქტებს ადგილი არ ჰქონია", - განაცხადა ირაკლი კობახიძემ.