დასავლეთის ქვეყნების მიერ სირიის დაბომბვას Twitter-ზე გამოეხმაურა საქართველოს საგარეო საქმეთა მინისტრი მიხეილ ჯანელიძე. მისი თქმით, ეს იერიში იყო საჭირო და შესაბამისი პასუხი ასადის მიერ საკუთარი ხალხის წინააღმდეგ ქიმიური იარაღის გამოყენებაზე.
„აშშ-ის, ბრიტანეთისა და საფრანგეთის სარაკეტო დარტყმები სირიის ქიმიურ იარაღთან დაკავშირებულ ობიექტებზე იყო საჭირო და შესაბამისი პასუხი ქიმიური იარაღით უდანაშაულო მოსახლეობაზე მიტანილ იერიშზე. ქიმიური იარაღის გამოყენება არის მიუღებელი და დამნაშავეებმა უნდა აგონ პასუხი“, - წერს მიხეილ ჯანელიძე.
Missile strikes by #US, #UK, #France on targets associated with the chemical weapons capabilities of #Syria is an appropriate & needed response to #SyriaChemicalAttack against civilian population.Use of chemical weapons is unacceptable & those responsible must be held accountable
— Mikheil Janelidze (@JanelidzeMkh) April 14, 2018
ამერიკის შეერთებულმა შტატებმა, დიდმა ბრიტანეთმა და საფრანგეთმა სარაკეტო იერიში სირიაზე დღეს მიიტანეს. „მე ვუბრძანე შეერთებული შტატების შეიარაღებულ ძალებს, რომ სირიის დიქტატორის ბაშარ ალ-ასადის ქიმიური იარაღის ინფრასტრუქტურაზე წერტილოვანი დარტყმები განახორციელონ“, - განაცხადა აშშ-ის პრეზიდენტმა დონალდ ტრამპმა.
სირიის დაბომბვა გამთენიისას დაიწყო და შვიდწლიანი სამოქალაქო ომის განმავლობაში, ეს სარაკეტო იერიში ყველაზე მასშტაბური შეტევაა დასავლეთის მხრიდან პრეზიდენტ ბაშარ ალ-ასადის წინააღმდეგ. ტრამპის განცხადებით, ეს არის პასუხი ქალაქ დუმაში სირიის ხელისუფლების მიერ ქიმიური იარაღის გამოყენებაზე.
„ამერიკელმა, ბრიტანელმა და ფრანგმა ერმა გამოიყენა თავისი სამართლიანი ძალა ბარბაროსობისა და სისასტიკის წინააღმდეგ“, - განაცხადა ტრამპმა.
სარაკეტო იერიში სირიაზე - რა დაბომბეს ამერიკელებმა, ბრიტანელებმა და ფრანგებმა
