მემანქანეთა დამოუკიდებელი პროფკავშირის, „ერთობა 2013-ის" გამგეობის თავმჯდომარის, რატი კაპანაძის განცხადებით, ხუთშაბათს, 3 მაისს დილის 06:00-დან თბილისის მეტროპოლიტენის შემადგენლობის 100% გაიფიცება. ამის შესახებ კაპანაძემ მეტროსადგურ „რუსთაველში" განაცხადა.
„ლიბერალის" კორესპონდენტის ცნობით, მემანქანეებიის მთავარი მოთხოვნაა, ანაზღაურება გაიზარდოს 45%-ის ოდენობით. მემანქანეების თქმით, ისინი საათობრივად 7 ლარს იღებენ, მათ სურთ, რომ ანაზღაურება 10 ლარამდე გაიზარდოს.
როგორც თბილისის ვიცე მერმა, ირაკლი ხმალაძემ 25 აპრილს განაცხადა, თბილისის მუნიციპალიტეტს დღესდღეობით, მეტროს მემანქანეებისთვის ხელფასის გაზრდის ფინანსური რესურსი არ აქვს.
დღეისთვის მემანქანეთა საშუალო თვიური ხელფასი საშემოსავლო გადასახადის გარეშე, 1150 ლარია. მემანქანეები ამბობენ, რომ არსებული ანაზღაურება შეუსაბამოა იმ გარემო-პირობებთან, სამუშაო ციკლთან თუ პასუხისმგებლობასთან შედარებით, რომელსაც ისინი ყოველდღიურობაში აწყდებიან.
„ისინი მთელ სამუშაო დღეს მიწის ქვეშ ატარებენ, სადაც მომეტებული ხმაურის, მაღალი ვიბრაციის, ჟანგბადის ნაკლებობის, რადიაციული ფონის პირობებში უწევთ მუდმივ დაძაბულ რეჟიმში მუშაობა და დღეში 400 000 მგზავრის უსაფრთხო ტრანსპორტირების უზრუნველყოფა. ამასთან, თავად მემანქანეთა მიერ ჩატარებული კვლევის მიხედვით, მემანქანეთა დიდ ნაწილში ფართოდ გავრცელებულია ადრეული სიკვდილი (მემანქანეთა თქმით საპენსიო 65 წლის ასაკს მეტროს მემანქანეთა 60% ვერ აღწევს) და გულ-სისხლძარღვთა დაავადებები“, - განუცხადა „ლიბერალს" EMC-ის იურისტმა ლინა ღვინიანიძემ 18 აპრილს.
„მეტროს მემანქანეები 2013 წლიდან ხელფასების მატებისთვის იბრძვიან, თუმცა სახელმწიფოს და კომპანიას არ გააჩნია კეთილი ნება, იზრუნოს და ღირსეული პირობები შეუქმნან ადამიანებს, რომლებიც საკუთარი სიცოცხლის ფასად ყოველდიურად ემსახურებიან ათი ათასობით მგზავრს;
ჩვენ ყველა გზა ვცადეთ იმისთვის, რომ თქვენი გადაადგილება არ შეფერხებულიყო, თუმცა კომპანია სხვა გზას არ გვიტოვებს.
- მეტროს მემანქანეების ხელფასი 2013 წლიდან არ შეცვლილა;
- პროფესია მემანქანე არის მძიმე, მავნე და საშიშპირობებიანი სამსახურის ათეულში;
- მემანქანეების უწევთ იმუშაონ სიცოცხლისთვის საშიში პირობებში (ვიბრაცია, დღის მიწის ქვეშ გატარები გამოწვეული მხედველობის პრობლემები, ხმაური, მომედებული დაბინძურებული ჰაერი, გილსისხლძარღვთა დაავადებები)", - აცხადებენ მემანქანეთა დამოუკიდებელი პროფკავშირის, „ერთობა 2013-ის" წევრები.
