თბილისის მერის, კახა კალაძის თქმით, თუკი მემანქანეები გაიფიცებიან, კანონით გათვალისწინებულ ღონისძიებებს მიმართავენ.
„ჩვენ არავითარ შემთხვევაში არ დავუშვებთ შანტაჟის ენით საუბარს. ამ ეტაპზე, არავითარი შესაძლებლობა არ არის იმისა, რომ ადამიანებს, რომლებსაც 1400 დან 1800 ლარამდე აქვთ ხელფასი, 45 პროცენტით მოვუმატოთ ანაზღაურება. გარდა მემანქანეებისა, ჩემთან დაახლოებით 24 000 ადამიანი მუშაობს, არის ძალიან საპასუხისმგებლო თანამდებობები, იგივე თუნდაც ბაღის პედაგოგები, თბილსერვისის თანამშრომლები, ადამიანები, რომლებსაც ოთხჯერ დაბალი ხელფასი აქვთ, მათ რა უნდა ვუპასუხო. ამიტომ, მე არ და ვერ მივიღებ იმ გადაწყვეტილებას, რომელიც დააზიანებს ჩემss ქალაქს და დააზიანებს იმ ადამიანებს, რომლებიც მუშაობენ ამ სისტემაში.
რაც ეს პროცესი დაიწყო და შანტაჟის ენით გვესაუბრებიან, დედაქალაქის მერია და კომპანია კანონს არ გაsცდენია. ჩვენ ვმოქმედებთ კანონის ფარგლებში. სასამართლომ გამოიტანა გადაწყვეტილება, დროებით შეუჩერა გაფიცვის უფლება, რადგან ჯერ საქმე განხილვის პროცესშია. სანამ გადაწყვეტილებას არ მიიღებენ, მემანქანეებს არ აქვთ უფლება, გაიფიცონ. თუმცა თუ ისინი მაინც მიიღებენ ამ გადაწყვეტილებას, რა თქმა უნდა, ჩვენ ვიმოქმედებთ კანონის ფარგლებში და მივმართავთ ყველა საშუალებას, რომელიც კანონს არ ეწინააღმდეგება. ეს იქნება ხელფასების დაკავება და ასე შემდეგ“, – განაცხადა კახა კალაძემ.
მეტროს მემანქანეები დღეიდან გაფიცვასა და შიმშილობას იწყებენ.
ადამიანის უფლებების სწავლებისა და მონიტორინგის ცენტრის (EMC) იურისტის ლელა გვიშიანის თქმით, მემანქანეთა პროფკავშირი ამ გზით სასამართლოს დაემორჩილა, მაგრამ თან პროტესტის რადიკალურ გზებს მიმართა.
„ერთობა 2013-მა“ გადაწყვიტა, რომ დაემორჩილოს სასამართლოს განჩინებას და გაფიცოს არასამუშაო დროებში. მიუხედავად იმისა, რომ ამ გადაწყვეტილებას უკანონოდ მივიჩნევთ. ამავდროულად, მემანქანეები მიმართავენ პროტესტს ყველაზე რადიკალური ფორმებით - დაიწყება შიმშილობის აქცია“, - უთხრა გვიშიანმა „ლიბერალს“.
