პრემიერ-მინისტრმა მამუკა ბახტაძემ დღეს განათლების, მეცნიერების, კულტურისა და სპორტის მინისტრის თანამდებობაზე მიხეილ ბატიაშვილი წარადგინა.
მიხეილ ბატიაშვილი ბიზნესისა და ტექნოლოგიების უნივერსიტეტის რექტორია, ამავდროულად კი უნივერსიტეტის 27%-ს ფლობს. გარდა უნივერსიტეტისა, ბატიაშვილი ფლობს წილს შპს წმიდა გიორგის სახელობის საერთაშორისო სკოლაში.
საჯარო დაწესებულებაში ინტერესთა შეუთავსებლობისა და კორუფციის შესახებ კანონის თანახმად, მინისტრის თანამდებობაზე დამტკიცების შემთხვევაში, მას ინტერესთა შეუთავსებლობის გამო, წილის გასხვისება მიუწევს.
უფრო კონკრეტულად, საუბარია ამავე კანონის მე-13 მუხლის მე-12 პუნქტზე, რომლის მიხედვითაც, თანამდებობის პირს, მისი ოჯახის წევრს უფლება არა აქვთ, ფლობდნენ აქციებს ან კაპიტალის წილს იმ საწარმოში, რომლის საქმიანობის კონტროლიც ამ თანამდებობის პირის ან მისი სამსახურის უფლებამოსილებას განეკუთვნება.
„ამ შემთხვევაში განათლების სამინისტროს უფლებამოსილებას განეკუთვნება ამ ორი საწარმოს კონტროლი. შესაბამისად, მას არ აქვს უფლება, რომ ამ ტიპის საწარმოში ფლობდეს კაპიტალს, თავად ან ოჯახის წევრი. აქ უკვე წილის მართვის უფლების გადაცემაზე აღარ არის საუბარი, წილების გასხვისება არის საჭირო, რათა ინტერესთა შეუთავსებლობა არ იყოს“,- უთხრა „ლიბერალს“ „საერთაშორისო გამჭვირვალობა-საქართველოს“ უფროსმა ანალიტიკოსმა, გიორგი ნასრაშვილმა.
განათლების მინისტრობის კანდიდატი კერძო სკოლისა და უნივერსიტეტის თანამფლობელია
მიხეილ ბატიაშვილი დამოუკიდებელი საქართველოს ისტორიაში მე-17 მინისტრი იქნება, რომელიც განათლების სამინისტროს უხელმძღვენელებს.
ყოფილმა მინისტრმა, მიხეილ ჩხენკელმა აღნიშნული თანამდებობა 2017 წლის ნოემბრიდან დაიკავა.
