შსს-ს განცხადებით, არასრულწლოვნის თვითმკვლელობამდე მიყვანაში ბრალდებულ პირს ბრალი დაუმძიმდა. გამოძიება მას არასრულწლოვნის მიმართ წინასწარი შეცნობით გარყვნილ ქმედებასაც ედავება.
გამოძიება სსკ-ს 115-ე მუხლით და 141-ე მუხლის 1-ლი ნაწილით მიმდინარეობს. ბრალის დამტკიცების შემთხვევაში დაკავებულს ხუთიდან შვიდ წლამდე პატიმრობა ემუქრება.
შინაგან საქმეთა სამინისტროს ინფორმაციით, ბრალდებულმა ოზურგეთის მუნიციპალიტეტის სოფელ ნატანებში მცხოვრები, 2002 წელს დაბადებული ნ.ბ. Facebook-ით გაიცნო. მოგვიანებით, მათი მიმოწერის გოგოს მშობლებისთვის ჩვენების მუქარით არასრულწლოვანი ინტიმური ფოტოებისა და ვიდეომასალის გადაღებასა და გაგზავნაზე დაითანხმა, შემდეგ კი აშანტაჟებდა. ამის შემდეგ გოგომ თავი მოიკლა.
1996 წელს დაბადებული მ.თ. თვითმკვლელობამდე მიყვანის ბრალდებით ოზურგეთში გუშინ დააკავეს.
