შინაგან საქმეთა სამინისტროში აცხადებენ, რომ  „რუსთავი 2-ის“ ეთერში ლაშა ნაცვლიშვილთან დაკავშირებით გასულ სიუჟეტზე სამსახურებრივი მოკვლევა დაიწყო. 

„შემოწმების ფარგლებში, დადასტურების შემთხვევაში, დადგება შესაძლო 
სამართალდარღვევის ჩამდენი ყველა პირის პასუხისმგებლობის საკითხი. 
შედეგების შესახებ საზოგადოებას უმოკლეს ვადებში ეცნობება“,- აცხადებენ შსს-ში. 

მთავარი პროკურორის ყოფილი მოადგილე ლაშა ნაცვლიშვილი მანქანას არაფხიზელ მდგომარეობაში მართავდა. ამის ამსახველი კადრები „რუსთავი 2-მა“ გაავრცელა. 

ტელეკომანიის ცნობით, ვიდეო 2017 წლის ივლისშია ჩაწერილი.

ანონიმური წყარო „რუსთავი 2-თან“ ამბობს, რომ პოლიცია დიდი ხნის განმავლობაში ცდილობდა ლაშა ნაცვლიშვილის გაჩერებას, რომელმაც საავარიო სიტუაცია რამდენჯერმე შექმნა. საპატრულო პოლიციის ეკიპაჟმა მძღოლს გაჩერებისკენ მოუწოდა, მაგრამ დაუმორჩილებლობის შემდეგ პატრული იძულებული გახდა ნაცვლიშვილს დადევნებოდა. 

„გადაჭარბებული სიჩქარე, საპატრულო პოლიციის ეკიპაჟის დაუმორჩილებლობა, ავარიული ვითარების შექმნა, მანევრირების წესების დარღვევა, ალკოტესტზე შემოწმების თავის არიდება და ბოლოს გაშვება", - ამბობს „რუსთავის 2-ის“ წყარო. 

სიუჟეტი ეთერში გასვლის შემდეგ ლაშა ნაცვლიშვილმა საკუთარ Facebook-გვერდზე დაადასტურა, რომ მანქანას არაფხიზელი მართავდა და კანონი დაარღვია. ის ბოდიშს უხდის ოჯახს და მაყურებელს.

საჭესთან ზედმეტად ნასვამი ვიჯექი, კანონი დავარღვიე - ლაშა ნაცვლიშვილი ვიდეოჩანაწერს ეხმაურება