სახალხო დამცველის, ნინო ლომჯარიას განცხადებით, პროცესი, თუ როგორ შეირჩა და დასახელდა უზენაესი სასამართლოს მოსამართლე კანდიდატები, გარკვეულწილად კონსტიტუციასთან შეუსაბამოა. ომბუდსმენი აღნიშნავს, რომ არ არსებობს პასუხი, თუ რა კრიტერიუმებით შეირჩნენ ისინი. ინფორმაციას „ინტერპრესნიუსი“ ავრცელებს.
„სახალხო დამცველი აქცენტს არ აკეთებს სიაზე, დასახელებული მოსამართლეების ვინაობაზე. ჩვენ აქცენტს ვაკეთებთ თავად პროცესზე. მიმაჩნია, რომ პროცესი, როგორც შეირჩა და დასახელდა წარმოდგენილი კანდიდატები, გარკვეული თვალსაზრისით კონსტიტუციასთანაც შეუსაბამობაშია, რადგან ჩვენი ქვეყნის კონსტიტუციით ყველა ადამიანს აქვს უფლება დაიკავოს საჯარო სამსახურში თანამდებობა. ამ შემთხვევაში, უზენაესი სასამართლოს მოსამართლე კანდიდატები ისე დასახელდნენ, რომ არავის გვაქვს პასუხი, რა კრიტერიუმების საფუძველზე შეირჩნენ, რა პროცედურით, რატომ შეირჩნენ ესენი და არა სხვები“, - განაცხადა ლომჯარიამ.
ლომჯარიას თქმით, სახალხო დამცველი პარლამენტს მიმართავს, შეაჩეროს პროცესი და წარდგენილ სიას მხარი არ დაუჭიროს.
„ამიტომ ჩვენ პარლამენტს მივმართავთ, ნებისმიერი ფორმით შეაჩეროს აღნიშნული პროცესი, ეს იქნება საკანონმდებლო ცვლილების ფორმით თუ იმით, რომ პლენარულ სხდომაზე ამ სიას მხარი არ დაუჭიროს“,-განაცხადა ლომჯარიამ.
იუსტიციის უმაღლესმა საბჭომ უზენაეს სასამართლოში წარსადგენ მოსამართლეთა 10 კანდიდატურა დაასახელა.
