„ჩემი წინამორბედის პოზიცია რაც იყო, იყო ძალიან მარტივი და არ მგონია მარტივი პასუხები იყოს ის, რასაც საზოგადოება პირადად ჩემგან ელოდება. მე მინდა, რომ უფრო შეგნებულად, მეტი პასუხისმგებლობით მოვეკიდო ამ საკითხს“, - ამის შესახებ პრეზიდენტმა სალომე ზურაბიშვილმა შეწყალების კომისიასთან და ნარკოდანაშაულში მსჯავრდებული პირების შეწყალებასთან დაკავშირებით დასმულ კითხვას უპასუხა.
მისი თქმით, მას სჭირდება დრო, რომ ამ საკითხებში გაერკვეს და საზოგადოებას საკუთარი პოზიცია და ხედვა გააცნოს.
„მე მინდა, რომ განახლებული ხედვა იყოს ამის მიმართ. რაც ამ საკითხით უფრო ახლოდან დავინტერესდი, ვატყობ, რომ ძალიან რთული საკითხია და ძალიან საპასუხისმგებლო. ამიტომ მე ნაადრევად ვერ გიპასუხებთ ამ საკითხზე. მინდა, რომ ბოლომდე გავერკვიო. შემოსულია ძალიან ბევრი თხოვნა... უნდა განვიხილოთ და ვნახოთ როგორ დავაკომპლექტოთ, ესეც ძალიან სერიოზული საკითხია, რომელიც ჩემში ბადებს ძალიან ბევრ კითხვას. ამიტომ, მე გთხოვთ, ცოტა დროს, ამ საკითხზე, რომ ბოლომდე ჩამოვყალიბდე", - განაცხადა ზურაბიშვილმა.
რაც შეეხება შეწყალების კომისიის თავმჯდომარეობას, ზურაბიშვილის თქმით, ნათელა მაჭავარიანი შეწყალების კომისიის არც წევრად და არც თავმჯდომარედ არ განიხილება: „ეს მისთვის ძალიან მძიმე ტვირთი იქნება და ჩემს მეგობარს ამას არ ვუსურვებ".
შეკითხვაზე, რა პრინციპით აირჩევა კომისიის შემადგენლობა, სალომე ზურაბიშვილმა უპასუხა, რომ კომისიის წევრებს აირჩევენ სანდოობის და სინდისის პრინციპით.
