საქართველოს პრემიერ-მინისტრის, მამუკა ბახტაძის თქმით, ცილისწამების დარეგულირების შესახებ პრეზიდენტის ინიციატივასა და სიტყვის თავისუფლების შეზღუდავას შორის კავშირი არ არსებობს. ბახტაძე მიიჩნევს, რომ მედიაპლურალიზმი და გამოხატვის თავისუფლება „ქართული ოცნების“ მთავარი მონაპოვარია, თუმცა დეზინფორმაციასთან ბრძოლას ყველა განვითარებული დემოკრატიის ქვეყანა ცდილობს.

„სიტყვის, გამოხატვის თავისუფლება და მედიაპლურალიზმი არის ჩვენი ხელისუფლების მთავარი მონაპოვარი და ამას განსაკუთრებით ვუფრთხილდებით.

რაც შეეხება ცრუ ინფორმაციას, დეზინფორმაციას, ეს არ არის მხოლოდ საქართველოს პრობლემა. ეს გლობალური პრობლემაა და ყველა განვითარებული დემოკრატია ცდილობს, მას ეფექტიანად აღუდგეს წინ.

მე ნამდვილად ვერ დავუკავშირებ ამ ორ თემას ერთმანეთს. ე.წ. „ფეიქ ნიუსებსა“ და დეზინფორმაციასთან ბრძოლა არის სახელმწიფოს ვალდებულება. განვითარებული დემოკრატიის ქვეყნები ცდილობენ, ჩამოაყალიბონ ისეთი ჩარჩო, რომლითაც თავიანთ საზოგადოებას, ეროვნულ ინტერესებს დაიცავენ ამ დეზინფორმაციისა და ე.წ. „ფეიქ ნიუსებისგან“.

აქვე კიდევ ერთხელ მინდა, ხაზი გავუსვა - სიტყვის თავისუფლება და მედიაპლურალიზმი არის ჩვენი ხელისუფლების უმთავრესი მონაპოვარი, რომელსაც ყველაზე მეტად ვუფრთხილდებით და ამ ორი თემის ერთმანეთთან დაკავშირება საფუძველს მოკლებულია“, - განაცხადა პრემიერ-მინისტრმა დღეს გამართულ ბრიფინგზე.

ცილისწამების აკრძალვაზე საქართველოს პრეზიდენტმა სალომე ზურაბიშვილმა თავდაპირველად საახალწლო მილოცვაში ისაუბრა. ინიციატივა პრეზიდენტმა კიდევ ერთხელ 11 იანვარს გააჟღერა. მისი თქმით, აუცილებელია, ადამიანებს არ შეელახოთ ღირსება მათ წინააღმდეგ მიმართული ცრუ ინფორმაციით. მაგრამ ამასთან საჭიროა სიტყვის თავისუფლების დაცვაც.

„ეს არის ის თემა, რომელიც აწუხებს ჩვენს საზოგადოებას, რომელმაც ძალიან დიდი ვნებათაღელვა წამოწია საზოგადოებაში.  საჭიროა ამის დაწყნარება.

ამავე დროს კარგად მესმის, რომ დაცული უნდა იყოს სიტყვის თავისუფლება და ხშირად ეს ორი პრინციპი დაპირისპირებაშია,  მაგრამ არიან ქვეყნები, რომლებმაც ეს გადაწყვიტეს. მაგალითად, საფრანგეთი, რომელმაც მიიღო კანონი ცილისწამების შესახებ, მაგრამ საკონსტიტუციომ დაამტკიცა რომ ეს არ მოდიოდა წინააღმდეგობაში არც სიტყვის თავისუფლებასთან, არც მთავარ ადამიანის უფლებებთან“, - განაცხადა ზურაბიშვილმა 11 იანვარს.