პარლამენტის წევრი ეკა ბესელია თანამოაზრე დეპუტატებთან ერთად ახალი პარტიის დაფუძნებას გეგმავს. „ინტერპრესნიუსის“ ინფორმაციით, პარლამენტის წევრი პარტიის შექმნას ივნისში აპირებს. თანადამფუძნებლები იქნებიან დეპუტატები გედევან ფოფხაძე და ზვიად კვაჭანტირაძე. პარტიის დამფუძნებელი ყრილობა კი ივნისის ბოლოს იგეგმება, სადაც ახალი სახეების წარდგენაც მოხდება.

როგორც ეკა ბესელიამ „ინტერპრესნიუსს“ განუცხადა, ამ დროისთვის აქტიური მუშაობა და კონსულტაციები მიმდინარეობს სხვადასხვა მიმართულებით.

ეკა ბესელიამ, გედევან ფოფხაძემ და ზვიად კვაჭანტირაძემ „ქართული ოცნება“ უზენაესი სასამართლოში მოსამართლეობის კანდიდატების შერჩევის საკითხზე დაწყებული უთანხმოების გამო დატოვეს.

ბესელიას მიერ ახალი პოლიტიკური ძალის შესაძლო შექმნაზე ინფორმაცია აპრილშიც გავრცელდა. 6 აპრილს ეკა ბესელიამ „ლიბერალს“ უთხრა, რომ „ქართული ოცნებიდან“ წასულ სხვა დეპუტატებთან ერთად, რომლებიც მისი თანამოაზრეები არიან, ახალი პოლიტიკური პლატფორმის შექმნას გეგმავდა.

„ახალ პოლიტიკურ პლატფორმას ვქმნით და ამაზე ვმუშაობთ. როგორი იქნება, ეს რამდენიმე თვეში გამოჩდება“, - განუცხადა ბესელიამ „ლიბერალს“ აპრილში.