შინაგან საქმეთა სამინისტრომ ლევან ვასაძე გამოკითხვაზე დაიბარა.
ლევან ვასაძე იმუქრება, რომ „თბილისი პრაიდისა" და მისი მხარდამჭერების წინააღმდეგ „თვითორგანიზებულ ჯგუფებს“, „სახალხო რაზმებს“ შექმნის, რომლებიც ერთი კვირის განმავლობაში თბილისში პატრულირებას მოახდენენ.
ვასაძის თქმით, „სტრუქტურა იქნება მარტივი, იერარქიული და აწყობილი".
„გვეყოლება ათეულები ათისთავებით, რაც შეიკვრება ასეულად და ეყოლება ასისთავი, რაც შეკრებს ათასეულს და იქნება ლეგიონი”, – ამის შესახებ ვასაძემ ვერის ბაღში შეკრებილი მხარდამჭერების წინაშე გამოსვლისას განაცხადა.
შსს-მ უკანონო ფორმირებების შექმნის ფაქტზე გამოძიება დაიწყო
შინაგან საქმეთა სამინისტრომ ჰომოფობიურად განწყობილი ბიზნესმენის ლევან ვასაძის მოწოდებების შემდეგ გამოძიება დაიწყო.
როგორც შსს-ს განცხადებაში ვკითხულობთ, უკანონო ფორმირების შექმნის, ხელმძღვანელობისა და მასში გაწევრების ფაქტებზე შინაგან საქმეთა სამინისტრომ გამოძიება საქართველოს სისხლის სამართლის კოდექსის 223-ე მუხლის პირველი ნაწილით დაიწყო.