მოსარჩელე მხარის თქმით, საკონსტიტუციო სასამართლოში „რუსთავი 2-ის“ სარჩელი, რომლითაც ეს უკანასკნელი „ამორალური გარიგების" მუხლის არაკონსტიტუციურად ცნობას მოითხოვს, არის სკანდალი, „რადგან ეს ნორმა ყველა ქვეყნის სამოქალაქო კოდექსშია".

„ეს მართლა სასაცილოა. მათმა სტრატეგიამ არ გაამართლა და წარმოდგენილი არგუმენტები დასაბუთებული არ არის. ახლა ამ ბოლო ხერხს მიმართეს, რომ გააუქმონ ნორმები, რომლებზეც სარჩელია აგებული. ერთ-ერთი მათგანია 54-ე მუხლი, თუმცა არა ერთადერთი. ჩვენ სხვა ნორმებზეც ვამყარებთ სარჩელს", - უთხრა „ლიბერალს" კახაბერ მჭედლიშვილმა.

მისი თქმით, საკონსტიტუციო სასამართლოს მიერ სარჩელის დაკმაყოფილების შემთხვევაში, მოსარჩელე არ დაზარალდება, რადგან საქალაქო სასამართლოში მათი სარჩელი მარტო 54-ე მუხლზე არ არის დაფუძნებული. 

„ჩვენი სარჩელი ეფუძნება 85-ე და 89-ე მუხლებსაც. ასეთ შემთხვევაში, ამ მუხლების ნორმების შეჩერებაც მოუწევთ" - ამბობს მჭედლიშვილი. 

„რუსთავი 2" და შპს „ტელეკომპანია საქართველო" საკონსტიტუციო სასამართლოს სამოქალაქო  კოდექსის 54-ე და 55-ე მუხლების არაკონსტიტუციურად ცნობის მოთხოვნით მიმართავენ. ეს სწორედ ის მუხლებია, რომლებსაც საქალაქო სასამართლოში ქიბარ ხალვაში „რუსთავი 2-ის“ წილების დასაბრუნებლად იყენებს.