ადვოკატთა ასოციაციის თავმჯდომარე ზაზა ხატიაშვილი ლევან მურისიძის დანიშვნას ბიძინა ივანიშვილსა და იუსტიციის უმაღლესი საბჭოს არამოსამართლე წევრების ნაწილს უკავშირებს. ისინი იუსტიციის საბჭოში „ქართული ოცნების" უმრავლესობამ აირჩია. 

„ლევან მურუსიძეს არჩევის გადაწყვეტილებას  სოფრომაძის, თოდრიას და ევა გოცირიძის [იუსტიციის უმაღლეს საბჭოში პარლამენტის მიერ არჩეული წევრები] გარეშე ამ გადაწყვეტილებას ვერ მიიღებდნენ", - როგორც „ლიბერალის" ჟურნალისტი იუწყება, ამის შესახებ იუსტიციის საბჭოს შენობასთან მიმდინარე საპროტესტო აქციაზე ზაზა ხატიაშვილმა განაცხადა. 

ზაზა ხატიაშვილი  პერმანენტული საპროტესტო აქციების დაწყებას აპირებს.

„ფეოდალის წინააღმდეგ აქციები იქნება. ივანიშვილი მტერია. შერჩევითი სამართალია", - აცხადებს ზაზა ხატიაშვილი. 

დღეს იუსტიციის უმაღლესმა საბჭომ, მოქმედი მდივანი, უზენაესი სასამართლოს მოსამართლე ლევან მურუსიძე სააპელაციო სასამართლოს მოსამართლედ აირჩია. 

მურუსიძის კანდიდატურას საბჭოში გამართულ კენჭისყრაზე 14 მოქმედი წევრიდან 10-მა დაუჭირა მხარი. 

მურუსიძეს უზენაესი სასამართლოს მოსამართლეობის ვადა მომავალი წლის აპრილში ეწურება. უზენაესი სასამართლოს მოსამართლისგან განსხვავებით [რომელსაც პრეზიდენტის წარდგინებით პარლამენტი ამტკიცებს], სააპელაციო სასამართლოში მოსამართლეებს იუსტიციის უმაღლესი საბჭო ნიშნავს.  

იუსტიციის უმაღლეს საბჭოში მიმდინარე კენჭისყრის პარალელურად მიმდინარე საპროტესტო აქციაზე ირაკლი კაკაბაძე და ბეჟან გუნავა დააკავეს.