თბილისის საქალაქო სასამართლოს მოსამართლის, ნანა დარასელიას ავტომობილის დაზიანების ფაქტზე გამოძიება 187-ე მუხლით მიმდინარეობს, რაც სხვისი ქონების დაზიანებას გულისხმობს.
ტელეკომპანია „რუსთავი 2-ზე“ გასული სიუჟეტის მიხედვით, დაზიანება მანქანამ ცეცხლსასროლი იარაღიდან გასროლის შედეგად მიიღო და, სავარაუდოდ, ტყვია მოსამართლის მანქანას საბარგულთან მოხვდა. დაზიანება მოსამართლემ 18 იანვარს საქალაქო სასამართლოს ეზოში აღმოაჩინა, თუმცა, სავარაუდოდ, მის ავტომობილს სხვა ადგილას ესროლეს. ნანა დარასელიამ მომხდარის შესახებ საპატრულო პოლიციას აცნობა.
როგორც „ლიბერალს“ შსს-ში უთხრეს, ამ ეტაპზე შეუძლებელია იმის თქმა, რომ დაზიანება სროლის შედეგადაა მიღებული.
„მანქანაზე არის უმნიშვნელო სახის დაზიანება. გამოძიება 187-ე მუხლით დავიწყეთ. გამოძიების ფარგლებში დანიშნულია ექსპერტიზა, რაც დაადგენს დაზიანების მიზეზსა და ხარისხს, ასევე - თუ რისგან იყო მიყენებული ეს დაზიანება. ნასროლიაო, ვერ ვიტყვით, არასწორი იქნება ამ ეტაპზე. ეს უნდა დადგინდეს ექსპერტიზის დასკვნის შედეგად“, - აცხადებენ შსს-ში.
მოსამართლე ნანა დარასელია ამჟამად საყდრისის საქმეს განიხილავს. დარასელიამ უნდა დაადგინოს, იყო თუ არა კანონიერი საყდრისის ძეგლის აფეთქებაზე ხელისუფლების მიერ გაცემული ბრძანება.
