დღეს ბათუმში გაეროს ევროპის ეკონომიკური კომისიის (UNECE)-ს გარემოსდაცვითი მინისტრიალი „გარემო ევროპისათვის" გაიხსნა, სადაც პრემიერ-მინისტრმა, გიორგი კვირიკაშვილმა ეკოლოგიური პრობლემების გადაჭრა ხელსიუფლების უმთავრეს პრიორიტეტად დაასახელა და ხაზი გაუსვა, რომ ყველა მოქალაქეს აქვს უფლება, იცხოვროს ჯანსაღ გარემოში:
„ჩვენი მიზანია, გავაძლიეროთ გარემოსდაცვითი ინსტიტუტები, ხელი შევუწყოთ საზოგადოების ინფორმაციასა და შესაბამის განათლებაზე ხელმისაწვდომობას, ამიტომ საქართველოში დაიწყო გარემოსდაცვითი განათლების ეროვნული სტრატეგიის შექმნის პროცესი," - განაცხადა გიორგი კვირიკაშვილმა. მან მდგრადი განვითარების აუცილებლობაზეც ისაუბრა და აღნიშნა, რომ საჭიროდ მიიჩნევს, ამ საკითხზე საზოგადოების ცნობიერება ამაღლდეს, ხალხმა შეიძინოს შესაბამისი ცოდნა და დაინერგოს ისეთი ქცევის წესები, რომელიც თავსებადი იქნება ჯანსაღ გარემოსთან.
კონფერენციის ძირითადი თემა „მწვანე ეკონიმიკის განვითარება, ჰაერის ხარისხის გაუმჯობესება და მდგრადი განვითარებისთვის განათლებაა“. ფორუმის მიმდინარეობისას გაეროს ევროპის ეკონომიკური კომისიის აღმასრულებელმა მდივანმა, კრისტიან ბახმაც შეკრებილ საზოგადოებას მიმართა და აღნიშნა, რომ ეკოლოგია სახელმწიფოებს შორის საზღვრებს შლის და ეკოლოგიური მდგომარეობის გაუმჯობესება საერთო საზრუნავია:
„მეოთხე ინდუსტრიული რევოლუცია უნდა იყოს მდგრადი განვითარება. უნდა გავუზიაროთ ქვეყნებმა ცოდნა ერთმანეთს და მივცეთ გარემოს უფლება, რომ სხვა და სხვა ერები გააერთიანოს ამ პრობლემის გარშემო," - აცხადებს კრისტიან ბახი.
კონფერენციაში მონაწილეობს გარემოსა და ბუნებრივი რესურსების დაცვის მინისტრი გიგლა აგულიშვილიც, რომლის თქმით, სახელისუფლებო სტრუქტურების წარმომადგენლები სისტემატურად მიმართავენ მონიტორინგს, რათა გააუმჯობესონ ჰაერის გაჯანსაღებისთვის საჭირო მექანიზმები:
„მონააცემები, რომელიც საქართველოში ბოლო თვეების განმავლობაში 60 წერტილში იზომება, არ არის საგანგაშო. გვაქვს რამდენიმე ადგილი, ურბანული ტიპის, სადაც გამონაბოლქვისა და მტვრის ნაწილაკების გამო სახარბიელო მდგომარეობა არ არის, მაგრამ ზოგჯერ. კიდევ ერთხელ ვიმეორებ, მდგომარეობა არაა კრიტიკული. ეს კონფერენცია დაგვეხმარება კიდევ უფრო გავაუმჯობესოთ ვითარება“.
„გარემო ევროპისათვის“ გაეროს სისტემაში არსებულ ორგანიზაციბს, გარემოსდაცვით ცენტრებს, რეგიონის 56 ქვეყანას, არასამთავრობო და კერძო სექტორს აერთიანებს. ღონისძიება 10 ივნისამდე გაგრძელდება.
The Guardian: მეოთხე ინდუსტრიულ რევოლუციას კაცობრიობისთვის იმედი და საფრთხე მოაქვს
