„ლიბერალიზაცია გულისხმობს, რომ სანქციები შერბილდეს ან გაუქმდეს ნარკოტიკების მოხმარებასთან დაკავშირებით. კონკრეტულად რა სანქციებს შეეხება ეს და რა ფორმით, ამას ვნახავთ უახლოეს მომავალში“, - ასე განმარტავს მსუბუქი ნარკოტიკის მოხმარების ლიბერალიზაციაზე „ქართული ოცნების" დაპირებას პარტიის ოზურგეთის მაჟორიტარი დეპუტატობის კანდიდატი არჩილ თალაკვაძე.
8 სექტემბერს „ქართული ოცნების" საარჩევნო პროგრამა გახდა ცნობილი, სადაც აღნიშნულია, რომ „მოხდება სასჯელის ლიბერალიზაცია მსუბუქი ნარკოტიკების მოხმარებასთან მიმართებით".
„პროგრამაში მოცემულია კონკრეტული აღწერა ნარკოპოლიტიკის ლიბერალიზაციასთან დაკავშირებით და ჩვენ აუცილებლად ბოლომდე მივიყვანთ ამ რეფორმას და შევძლებთ, რომ საქართველოში 4-სვეტიანი ევროპული ნარკოპოლიტიკა განვახორციელოთ“, - აღნიშნა თალაკვაძე.
რაც შეეხება „ლიბერალის“ კითხვას, თუ რას გეგმავს „ქართული ოცნება“ ე.წ. მძიმე ნარკოტიკებთან დაკავშირებით, რაზეც საუბარი პროგრამაში არაა, თალაკვაძე აღნიშნავს:
„ჩვენ ვაპირებთ, რომ პროფესიულ წრეებთან, მათ შორის ევროპელ ექსპერტებთან გავიაროთ კონსულტაციები, გავიაროთ თითოეული რისკი და თითოეული საჯარო სიკეთე, რომელიც ამ რეფორმას ახლავს და შემდეგ მივიღოთ გადაწყვეტილებები. თუმცა პოლიტიკური ნება, რომ მოხდეს ნარკოპოლიტიკის ლიბერალიზაცია, არსებობს“, - აღნიშნა თალაკვაძემ.
პარტია „ქართული ოცნების" 2016 წლის საპარლამენტო არჩევნების პროგრამაში ასევე ნათქვამია, რომ სახელმწიფო გააუმჯობესებს ნარკოდამოკიდებული პირებისთვის ჯანდაცვის სერვისების ხელმისაწვდომობასა და ხარისხს.
„პრევენციული პროგრამებით, სახელმწიფო უზრუნველყოფს ნარკოტიკების უკანონო მოხმარებაში ადამიანების, განსაკუთრებით ახალგაზრდების ჩაბმის თავიდან არიდებას", - წერია პროგრამაში.
