განათლებისა და მეცნიერების სამინისტროში, სახელმძღვანელოების გამომცემლებმა და ავტორებმა პროტესტის ნიშნად, მინისტრის მოადგილესთან შეხვედრა დატოვეს.
როგორც „ლიბერალს“ გამომცემლობა „ინტელექტის“ ხელმძღვანელმა კახმეგ კუდავამ განუცხადა, სამინისტრომ არ გაიზიარა გამომცემელთა მოთხოვნები. 12 გამომცემლობამ საქართველოს განათლებისა და მეცნიერების მინისტრს ალექსანდრე ჯეჯელავას განცხადებით გუშინ მიმართა. როგორც განცხადებაშია აღნიშნული სამინისტროს მიერ შეთავაზებული სასკოლო სახელმძღვანელოების გრიფირების წესის მიხედვით, გამომცემლები და ავტორები სურვილისა და მზადყოფნის მიუხედავად, კონკურსში მონაწილეობას ვერ მიიღებენ, რადგან გრიფირების პირობები თანაბარ კონკურენციასა და შრომის სამართლიან ანაზღაურებას არ უზრუნველყოფს.
„ეს არ არის ბოიკოტი სამინისტროს მიმართ, პირიქით, სამინისტრო უცხადებს ბოიკოტს გამომცემლებსა და ავტორებს. შეხვედრის დასაწყისში მინისტრის მოადგილემ დაიწყო იგივე საუბარი, რასაც ვუსმენთ უკვე 7 თვის განმავლობაში. ეს არის საკუთრების შელახვა, დაყაჩარება, წართმევა. სამინისტრო არცერთ იმ პუნქტს არ ითვალისწინებს, რაც გამომცემლობებმა შევთავაზეთ, არც ერთი მუხლის შესრულებაზე არ არის მზაობა, რომ გაიზიარონ. ამიტომ, ყველა ქართულმა გამომცემლობამ და ავტორებმა პროტესტის ნიშნად დავტოვეთ შეხვედრა“,- უთხრა „ლიბერალს“ კახმეგ კუდავამ.
წიგნის გამომცემლები: გრიფირების პირობები თანაბარ კონკურენციას არ უზრუნველყოფს
