„კურიერის" მთავარი გამოშვების წამყვანი, ზაალ უდუმაშვილი გუშინ მაყურებელს დაემშვიდობა და პოლიტიკაში წასვლის შესახებ გადაწყვეტილება გააცნო. მას თბილისის მერობის კანდიდატობა სურს. „ეს არის ჩემი ბოლო მამართვა მაყურებლისადმი, როგორც „კურიერის" წამყვანის. დღეს მე 25-წლიან სატელევიზიო კარიერას ვასრულებ, თუმცა თქვენთან ურთიერთობას უკვე არა ეკრანიდან, არამედ უშუალო ურთიერთობით განვაგრძობ“,- განაცხადა მან „კურიერის“ ეთერში. 

პოლიტოლოგი გია ნოდია უდუმაშვილის კანდიდატურის შესახებ „ლიბერალს" ესაუბრა. ნოდიას თქმით, არ აქვს მაღალი შანსი, გახდეს თბილისის მერი. თუმცა პოლიტოლოგი მიიჩნევს, რომ, სავარაუდოდ, თბილისის მერის არჩევნებზე იქნება მეორე ტური. 

„უდუმაშვილს პოლიტიკური გამოცდილება არ აქვს, მაგრამ ეს ნაკლად არ მიიჩნევა, რადგან ბიძინა ივანიშვილსაც არ ჰქონდა ეს გამოცდილება და მგონი ამიტომ მოსწონდა ხალხს. ამ ეტაპზე „ქართული ოცნების“ კანდიდატი არის ფავორიტი, მაგრამ არ გამოვრიცხავ, რომ თბილისის მერის არჩევნებზე იყოს მეორე ტური და მეორე ტურში რა მოხდება, ძნელი სათქმელია. მე არ მიმაჩნია, რომ ზაალ უდუმაშვილის შანსი მაღალია“,- ამბობს გია ნოდია „ლიბერალთან“. 

ზაალ უდუმაშვილი: მივიღე გადაწყვეტილება და მივდივარ პოლიტიკაში