პროკურატურამ ხორავას ქუჩაზე მომხდარი მკვლელობის დეტალების შესახებ განცხადება გაავრცელა. 

პროკურატურის განცხადებით მიხედვით, 1 დეკემბერს, დილის საათებში, 51-ე საჯარო სკოლის მეცხრე კლასის მოსწავლეებს თ.ჩ.-ს და ა.ს.-ს შესვენებაზე, საპირფარეშოში, ექვსი უფროსკლასელი დახვდა, ერთ-ერთმა პნევმატური იარაღი მიუშვირა მეცხრეკლასელს, რასაც  სიტყვიერი დაპირისპირება მოჰყვა. 

ერთ-ერთმა უფროსკლასელმა მათ უთხრა რომ გაკვეთილის შემდეგ ორივეს (მეცხრეკლასელებს)  სკოლის გარეთ შეხვდებოდნენ. 

მომხდარიდან მალევე ერთ-ერთმა მეცხრეკლასელმა ა.ს.-მ, ვინაიდან კონფლიქტში მყოფები უფროსები იყვნენ, დახმარებისთვის არასრულწლოვან ნათესავს - მ.კ.-ს დაურეკა და მომხდარის შესახებებ უამბო. 

იმავე დღეს, დაახლოებით 14:00 საათზე, მ.კ. მეგობრებთან ერთად N51-ე საჯარო სკოლასთან მივიდა, სადაც მათ ა.ს. და თ.ჩ. შეუერთდნენ. 

სკოლასთან ასევე შეკრებილები იყვნენ თ.ჩ.-სთან და ა.ს-სთან  დაპირისპირებული მეთერთმეტე კლასელები და მათი თხუთმეტამდე მხარდამჭერი. 

ვითარების გასარკვევად ახალგაზრდებმა ა.ხორავას ქუჩაზე არსებულ ერთ-ერთი კორპუსის ეზოში გადაინაცვლეს. 

მოზარდებს შორის საუბარი სიტყვიერ შელაპარაკებაში გადაიზარდა, რასაც ფიზიკური დაპირისპირება მოჰყვა. 

პროკურატურამ 51-ე სკოლასთან მკვლელობის საქმეზე ორი პირი პასუხისგებაში მიეცა

“ჩხუბის დროს ერთ-ერთმა მონაწილემ გ.ჯ.-მ, რომელსაც გაცნობიერებული ჰქონდა, რომ კონფლიქტის მონაწილეები არასრულწლოვნები იყვნენ, დანით განზრახ მოკვლის მიზნით, არასრულწლოვან დ.ს.-ს მრავალრიცხოვანი ნაკვეთი ჭრილობა მიაყენა, ხოლო გ.ბ.-მ ასევე დანით განზრახ მოკვლის მიზნით, წინასწარი შეცნობით არასრულწლოვან ლ.დ.-ს ორი ნაკვეთი ჭრილობა ფეხისა და გულმკერდის არეში მიაყენა, შემდეგ კი ორივე ბრალდებული შემთხვევის ადგილიდან მიიმალა.” - ნათქვამია პროკურატურის განცხადებაში. 

თბილისის პროკურატურამ ქ.თბილისის 51-ე საჯარო სკოლასთან მომხდარ ფაქტთან დაკავშირებით, წინასწარი შეცნობით არასრულწლოვნის მიმართ განზრახ მკვლელობის შესაძლო ფაქტზე ორი არასრულწლოვანი პირი - გ.ბ და გ.ჯ სისხლისსამართლებრივ პასუხისგებაში მისცა.  

გ.ბ-ს ბრალდება საქართველოს სისხლის სამართლის კოდექსის 109-ე მუხლის მეორე ნაწილის „ბ“ ქვეპუნქტით  წარედგინა, ხოლო  გ.ჯ იმავე მუხლით ბრალდებულად დაუსწრებლად იქნა ცნობილი, ვინაიდან იგი ემალება გამოძიებას.