„გაუგებარია, პრეზიდენტმა განსაკუთრებით დიდი ოდენობისა და საზღვრის კვეთის მუხლი რატომ დატოვა გარეთ და ამ კუთხით დებულებაში ცვლილება რატომ არ შევიდა. უსამართლობაა და არათანაბარ სიტუაციაში აყენებს მსჯავრდებულებს“, - „ლიბერალთან“ საუბრისას „თეთრი ხმაურის მოძრაობის“ აქტივისტმა დათო სუბელიანმა ნარკოდანაშაულთან დაკავშირებით შეწყალების კომისიის დებულაში შესული ცვლილებები შეაფასა.
როგორც დღეს გახდა ცნობილი, შეწყალების კომისია სასჯელის ვადის კრიტერიუმების გარეშე განიხილავს იმ მსჯავრდებულთა განაცხადს, რომლებმაც ჩაიდინეს ნარკოტიკული დანაშაულები, გარდა ნარკოტიკული და ფსიქოტროპული საშუალებების გასაღების, ასევე, განსაკუთრებით დიდი ოდენობით ნარკოტიკული ნივთიერებების შეძენა-შენახვისა და შემოტანა-ტრანზიტისა.
სუბელიანის თქმით, სამოქალაქო სექტორის შეწყალების კომისიასთან შეხვედრისას საუბარი იყო, რომ ვინაიდან ოდენობები თავდაყირა არის დალაგებული კანონმდებლობაში, აზრი არ ექნებოდა ოდენობებთ ხელმძღვანელობას და ამ კუთხით გამიჯვნას.
„ამიტომ იყო დღევანდელი განცხადება გაუგებარი, სადაც განსაკუთრებით დიდ ოდენობაზე და საზღვარზე შემოტანაზეა საუბარი, იმიტომ რომ ორივე შემთხვევა პრინციპში ჩვეულებრივი მომხმარებლის ქცევაში ჯდება - საზღვარზეც შეიძლება გადმოიტანო შენი პირადი მიზნისთვის ნარკოტიკი და ასევე შესაძლოა, რეალურად მცირე ოდენობა გქონდეს და ეს გეთვლებოდეს განსაკუთრებით დიდ ოდემობად. მნიშვნელოვანი იქნებოდა, რომ მხედველობაში მიეღოთ ეს უსამართლობა“, - ამბობს სუბელიანი.
მისი თქმით, შეწყალების კომისიას ამ მუხლით მსჯავრდებულებისთვის კომისიისთვის გამარტივებული გზით მიმართვის საშუალება უნდა მიეცა და შეწყალების საკითხი შემდეგ ინდივიდუალურად გადაეწყვიტა.
როგორც „ლიბერალთან" საუბრისას ზვიად ქორიძემ აღნიშნა, განსაკუთრებით დიდი ოდენობის საკითხი ფართო თემაა. შეიძლება განსაკუთრებით დიდი ოდენობა იწყებოდეს 2 გრამიდან და ადიოდეს 800 გრამზე. ამიტომ საკითხი ინდივიდუალური განხილვის საგანია.
„ჩვენ, რა თქმა უნდა, ამ მსჯავრდებულებს არ ვუზღუდავთ საშუალებას, რომ დადგენილი კრიტერიუმებით შემოიტანონ განაცხადი. თუ ისინი არ აკმაყოფილებენ ვადის კრიტერიუმებს, ჩვენ საქმის მასალებს გავეცნობით და შეიძლება, განსაკუთრებული წესით ვიხელმძღვანელოთ.
განსაკუთრებული გარემოებებით განხილვა ნიშნავს იმას, რომ კომისიის რომელიმე წევრს შეუძლია დააყენოს კონკრეტული მსჯავრდებულის საკითხი. ამ შემთხვევაში დებულებაში არის დათქმა, რომ კენჭისრყაში უნდა მონაწილეობდეს ¾ წევრებისა და გადაწყვეტილება უნდა იყოს მიღებული ერთხმად“, - აღნიშნავს ქორიძე.
სუბელიანის თქმით კი, ამგავრი დათქმის გამო შეწყალების კომისიისადმი გამარტივებულად მიმართვას ის მსჯავრდებულებიც ვერ შეძლებენ, ვინც 2 გრ. ნარკოტიკული ნივთიერების ფლობისთვის განსაკუთრებით დიდი ოდენობის მუხლით იხდიან სასჯელს, ამიტომ შეწყალების კომისიას ამ მუხლით მსჯავრდებულებისთვის გამარტივებული გზით მიმართვის საშუალება უნდა მიეცა და შეწყალების საკითხი შემდეგ ინდივიდუალურად გადაეწყვიტა.
