„კვირიკეში ხეების მოჭრასთან დაკავშირებით უკანონო ქმდებებასთან არ გვაქვს საქმე. ეს არის ოპონენტების ცრუ ბრალდება და კიდევ ერთი მცდელობა მოსახლეობის შეცდომაში შეყვანისა“, - ამის შესახებ „ლიბერალს“ ქობულეთის მერმა, მირიან ქათამაძემ განუცხადა.

მისი თქმით, ტერიტორია, სადაც ხეები იჭრება, კერძო საკუთრებას წარმოადგენს და ასეთ შემთხვევაში ჭრაზე ნებართვას მუნიციპალიტეტისგან არ საჭიროებს. 

„ტერიტორია, სადაც ხეები იჭრება კერძო საკუთრებებს წარმოადგენს. კერძო საკუთრებაში ხეების მოჭრაზე მუნიციპალიტეტის თანხმობა საჭიროა იმ შემთხვევაში, როცა მესაკუთრეს სურს ხეების ტრანსპორტირება. აღნიშნულ ტერიტორიაზე ხეების მოჭრასთან დაკავშირებით, დღეის მდგომარეობით, მოგვმართა ერთმა მოქალაქემ, რომლის მოთხოვნაც დაკმაყოფილებულია.

საქართველოს მთავრობის 2014 წლის 10 იანვრის N46 დადგენილების მე-8 მუხლის შესაბამისად, მუნიციპალიტეტს კერძო საკუთრებში არსებულ ტერიტორიაზე მოპოვებული ხე-მცენარეების საქართველოს ტერიტორიაზე ტრანსპორტირებისათვის სავალდებულოა მუნიციპალიტეტის ორგანოს მიერ გაცემული ხე-მცენარეების ადგილწარმოშობის ცნობა“, - ნათქვამია მერის განცხადებაში. 

„ერთიანი ნაციონალური მოძრაობის" წევრმა, რეზო ხარაზმა Facebook-ში ქობულეთის მუნიციპალიტეტის სოფელ კვირიკედან ფოტოები გაავრცელა, სადაც ასახულია გაჩეხილი ხეები. მისი თქმით, ხეები გაიჩეხა და მოიჭრა, იმ ხის ტრანსპორტირებისთვის, რომელიც ბიძინა ივანიშვილს სოფელ კვირიკეს ერთ-ერთი ოჯახიდან გადააქვს. 

ფოტო► ენმ: ქობულეთის მუნიციპალიტეტში ივანიშვილის ხის ტრანსპორტირებისთვის ხეები გაჩეხეს