საჯარო რეესტრის ეროვნული სააგენტოს თავმჯდომარის, პაპუნა უგრეხელიძის მხრიდან სავარაუდო სექსუალური შევიწროების ბრალდებით კიდევ ერთი საქმე სასამართლოშია.
მას შემდეგ, რაც სახალხო დამცველის დასკვნა გავრცელდა, რომლითაც ომბუდსმენმა პაპუნა უგრეხელიძის მხრიდან თანამშრომლის მიმართ დისკრიმინაცია დაადგინა, ცნობილი გახდა, რომ პაპუნა უგრეხელიძის მიმართ სხვა ბრალდებებიც არსებობს, რომელზეც ახალგაზრდა იურისტთა ასოციაცია მუშაობს.
ახალგაზრდა იურისტთა ასოციაციის იურისტი ნონა ქურდოვანიძე „ლიბერალთან“ დეტალებზე არ საუბრობს, თუმცა აღნიშნავს, რომ საია მუშაობს სხვა საქმეზეც, რომელიც სასამართლოშია და ამ შემთხვევაშიც დისკრიმინაციის დადგენას მოითხოვენ.
„ანტიდისკრიმინაციული კანონმდებლობა ითვალისწინებს ორ მექანიზმს: სახალხო დამცველისადმი მიმართვას ან სასამართლოსადმი მიმართვას. ჩვენ მივმართეთ სასამართლოს. სექსუალურ შევიწროებასთან დაკავშირებით კანონმდებლობა ხარვეზიანია. ანტიდისკრიმინაციულ კანონში პირდაპირ არ არის განმარტებული შევიწროება, როგორც დისკრიმინაციის ფორმა, მაგრამ ვფიქრობთ საერთაშორისო მიდგომით და სტანდარტების გათვალისწინებით, შესაძლებელია, სასამართლომ ამ შემთხვევაშიც მიიჩნიოს შევიწროება დისკრიმინაციის ფორმად. როგორც ეს სახალხო დამცველმა გააკეთა თავისი მექანიზმის გამოყენებით,“ - ამბობს ნონა ქურდოვანიძე.
საჯარო რეესტრის ეროვნული სააგენტოს თავმჯდომარის, პაპუნა უგრეხელიძის მხრიდან სექსუალური შევიწროების ფაქტი ომბუდსმენის აპარატმა 2017 წელს შეისწავლა და დისკრიმინაცია დაადგინა.
სახალხო დამცველის დასკვნის მიხედვით: „პაპუნა უგრეხელიძემ, სექსუალური შევიწროებით გამოხატული, სქესის ნიშნით შევიწროება განახორციელა".
ფაქტის შესახებ მას შემდეგ გახდაცნობილი, რაც მსხვერპლმა ამაზე საუბარი გადაწყვიტა და Imedinews -ს ინტერვიუ მისცა. სახალხო დამცველის დასკვნით, მედია ამის შემდეგ დაინტერესდა.
იუსტიციის სამინისტროს პრესსამსახურის განცხადებით, უგრეხელიძე აშშ-ში მივლინებაშია და კომენტარს დაბრუნების შემდეგ გააკეთებს.
საჯარო რეესტრის ხელმძღვანელს სექსუალურ შევიწროებაში ადანაშაულებენ
SMS-ები ►რას სწერდა სექსუალურ შევიწროებაში მხილებული პაპუნა უგრეხელიძე თანამშრომელ ქალს
