„ჩვენ იქით კვირაში გამოვაცხადებთ სააბოლოო გადაწყვეტილებას დოკუმენტთან დაკავშირებით, მანამ კიდევ გაგრძელდება კონსულტაციები და შემდეგ მიიღება გადაწყვეტილება“,- ამის შესახებ თბილისის ვიცე-მერმა, გენგეგმის განხილვის დასრულების შემდეგ განაცხადა. თუმცა ისიც აღნიშნა, რომ „სითი ინსტიტუტთან“ კონსულტაცია მხოლოდ იმ შემთხვევაში გაგრძელდება, თუ ჯგუფი მერიის პოზიციებს მიიღებს.
მისი თქმით, მერია გადაწყვეტილებას დედაქალაქის ინტერესებიდან გამომდინარე მიიღებს. ვიცე-მერის განმარტებით, მათი მთავარი მიზანია, ქალაქს სრულყოფილი და შესრულებადი გენერალური გეგმა ჰქონდეს.
„ძალიან კარგია და მისასალმებელია, რომ გენგეგმის ჯგუფი გამოთქვამს მზაობას, რომ გააგრძელოს ამ თემაზე მუშაობა.“.
„დოკუმენტის მიღებით არ მთავრდება საქმე, დოკუმენტის მიღებით იწყება საქმის კეთება. ამიტომ დოკუმენტი უნდა იყოს სრულყოფილი და არ უნდა ლახავდეს ადამიანების უფლებებს და ინტერესებს“,- განაცხადა ირაკლი ხმალაძემ.
გენგეგმაზე მუშაობა სამი წელია, მიმდინარეობს. ამისთვის თბილისის მერიამ ბიუჯეტიდან 2 800 000 ლარი გადაიხადა. დოკუმენტის 5 ეტაპი დამტკიცებულია, საბოლოო ეტაპზე კი მერიამ ჯგუფი ერთი და იგივე შენიშვნის სამჯერ გაუთვალისწინებლობისთვის 2017 წლის დეკემბერში 140 ათასი ლარით დააჯარიმა. „სითი ინსტიტუტს“ შენიშვნების გამოსასწორებლად 45-დღიანი ვადა მიეცა. მერიაში ამბობენ, რომ გენგეგმასთან დაკავშირებით მათ კითხვები ჯერ კიდევ აქვთ.
