ადმიანის უფლებების სწავლებისა და მინიტორინგის ცენტრის (EMC) შეფასებით, გიორგი შარაბიძის საქმეში არსებული მტკიცებულებები გონივრულ ეჭვს მიღმა სტანდარტით ვერ ადასტურებდა მისთვის წაყენებულ ბრალს.

გიორგი შარაბიძე ნარკოტიკული საშუალების უკანონო შეძენა-შენახვისთვისაა მსჯავრდებული. ის დანაშაულს არ აღიარებს და აცხადებს, რომ ნარკოტიკი ჩაუდეს. 

EMC-ის შეფასებით, გიორგი შარაბიძის საქმის განხილვისას სასამართლო კრიტიკულად მიუდგა დაცვის მხარის მტკიცებულებებს, მაშინ, როდესაც ბრალდების მხარის მტკიცებულებებთან მიმართებით იგივე არ განუხორციელებია.

„უფრო მეტიც, სასამართლოს განაჩენში იმგვარად აქვს ასახული დაცვის მხარის მტკიცებულებები, რომ მისი წაკითხვით შთაბეჭდილება იქმნება, თითქოს შესაძლებელია დაცვის მხარის მოწმეები არ შესწრებოდნენ გიორგი შარაბიძის პირად ჩხრეკასა და დაკავებას. თუმცა საპირისპირო დასტურდება სხდომის ოქმით, სადაც სრულად არის ასახული მოწმეთა ჩვენებები.

წარმოდგენილ ანგარიშში ყურადღება გამახვილებულია ყველა იმ რელევანტურ გარემოებასა და მტკიცებულებაზე, რაც ერთობლიობაში გამოძიების ობიექტურობისა და განაჩენის კანონიერების პრობლემაზე მიუთითებს, მათ შორის:

• გიორგი შარაბიძის ჩვენება, რომელიც მიუთითებდა, რომ მას არ ჰქონია ნარკოტიკული საშუალებები და რომ მისი პირადი ჩხრეკა ჩატარდა არა ატენის ქუჩაზე, როგორც ეს პირადი ჩხრეკის ოქმშია ასახული, არამედ პოლიციის განყოფილებაში;

• დაცვის მხარის მოწმეთა ჩვენებები, რომლებიც აღნიშნავენ, რომ გიორგი შარაბიძის პირადი ჩხრეკა ატენის ქუჩაზე არ ჩატარებულა. ამ მხრივ განსაკუთრებით მნიშვნელოვანია ერთ-ერთი მოწმის ჩვენება, რომლის თანახმადაც, პოლიციის თანამშრომლების მიერ გიორგი შარაბიძის ატენის ქუჩაზე ჩამოყვანის მომენტიდან, მის წაყვანამდე, ისინი მუდამ მისი თვალთახედვის არეში იყვნენ. მისივე თქმით, მთელი ამ ხნის განმავლობაში გიორგი შარაბიძის არც პირადი ჩხრეკა ჩატარებულა და არც ოქმი შეუდგენიათ პოლიციელებს;

• ქიმიური ექსპერტიზის დასკვნა, რომელიც გამორიცხავს გიორგი შარაბიძის ჟილეტში ნარკოტიკული საშუალების, ახალი ფსიქოაქტიური ნივთიერების ან ფსიქოტროპულო ნივთიერების არსებობას.

• ბილოგიური (გენეტიკური) ექსპერტიზის დასკვნა, რომლის თანახმადაც ნივთიერ მტკიცებულებებზე - ნარკოტიკული საშუალებების შეფუთვებზე აღინიშნება არა გიორგი შარაბიძის, არამედ სხვა პირთა გენეტიკური პროფილები", - წერს EMC.

„ჩადება შენც გემუქრება!", - აქცია გიორგი შარაბიძის მხარდასაჭერად