უმრავლესობის წევრი დავით ჭიჭინაძე ამბობს, რომ საქართველოს მთავრობა უნდა გადადგეს. მან ამის შესახებ ტელეკომპანია „რუსთავი 2-ის“ ეთერში ისაუბრა.
„დღესაც იმავე აზრზე ვარ, რომ ცვლილებები საჭიროა, განსაკუთრებით მაშინ, როდესაც გამოქვეყნდა UNICEF-ის კვლევები. მთავრობა უნდა გადადგეს, ეს საკითხია დღის წესრიგში დასაყენებელი", - აღნიშნა ჭიჭინაძემ.
გუშინ „ქართული ოცნების“ ოფისში სხდომა გაიმართა. შეხვედრიდან გამოსულმა უმრავლესობის წევრებმა აღნიშნეს, რომ შეხვედრა მთავრობაში დაგეგმილ ცვლილებებს არ ეხებოდა და UNICEF-ის მოსახლეობის კვლევას შეეხებოდა.
„მოსახლეობის კეთილდღეობის კვლევის“ მიხედვით, საქართველოში სიღარიბის მაჩვენებლები გაიზარდა.
როგორც კვლევის ანგარიშშია აღნიშნული ეროვნულ დონეზე, მოსახლეობის 5%, ბავშვების 7% და პენსიონერების 4% უკიდურესი სიღარიბის ზღვარს ქვემოთ ცხოვრობს.
უფრო კონკრეტულად კი, უკიდურესი სიღარიბის ზღვრად მიჩნეულია 1.25 აშშ დოლარი დღეში, რაც ზრდასრულ პირზე თვეში 82.8 ლარს შეესაბამება.
შეფასების თანახმად, უკიდურეს სიღარიბეში მყოფი პირების წილი სოფლად 4%-ია, ხოლო ურბანულ დასახლებებში - 4.5%.
2015 წლიდან 2017 წლამდე პერიოდში, უკიდურესი სიღარიბის ზღვარს ქვემოთ მყოფი შინამეურნეობების რაოდენობა დაახლოებით 3%-ით გაიზარდა, მოსახლეობისა - 3%-ით, ბავშვების - 4%-ით და პენსიონერების 2%-ით.
