გორის სასამართლომ სათემო რადიო „მოზაიკის“ დირექტორის, გვანცა დოლუაშვილის წინააღმდეგ საქმის წარმოება შეწყვიტა. ამის შესახებ ინფორმაციას რადიო „მოზაიკა“ ავრცელებს.
გორის რაიონული სასამართლოს მოსამართლემ, დავით პაპუაშვილმა მიიჩნია, რომ პოლიციის მიერ წარდგენილი მტკიცებულებები არ იყო საკმარისი გვანცა დოლუაშვილის შესაძლო ბრალეულობის დასამტკიცებლად.
„შსს, დაიწყე ბოდიშით“ - გორში ჟურნალისტ გვანცა დოლუაშვილის მხარდამჭერი აქცია იმართება
„შინაგან საქმეთა სამინისტრო გვანცა დოლუაშვილის დაჯარიმებას სარალიძის მკვლელობის ობიექტური გამოძიების მოთხოვნით გორის ერთ-ერთ ქუჩაზე გაკეთებული წარწერის - „მკვლელი ქუჩაშია" გამო მოითხოვდა. შსს-ს მიერ აღძრული საქმე მხოლოდ პოლიციელების ჩვენებებს ეყრდნობოდა და სხვა მტკიცებულებით გამყარებული არ იყო,“ - ავრცელებს რადიო.
არ არის ცნობილი, გაასაჩივრებს თუ არა შინაგან საქმეთა სამინისტრო გორის რაიონული სასამართლოს გადაწყვეტილებას.
ამავე თემაზე:
შსს, საპროტესტო წარწერების გამო, რადიო „მოზაიკის“ დირექტორის დაჯარიმებას მოითხოვს