როგორც „ლიბერალს“ თბილისის მერიაში განუცხადეს, გუშინ, გვიან ღამით მერიის ზედამხედველობის საქალაქო სამსახურსა და რაიონულ გამგეობაში მოსახლეობისგან შევიდა შეტყობინება ყიფიანის ქუჩაზე კედლის ჩამოშლასთან დაკავშირებით. თუმცა, მათივე ცნობით, „ინფორმაცია ადგილზე ოპერატიულად გადამოწმდა და დადგინდა, რომ ასეთი ფაქტი არ მომხდარა.“
„ყიფიანის ქუჩაზე მიმდინარე მშენებლობა სამი თვის განმავლობაში შეჩერებული იყო, ვიდრე ხელახალი გეოლოგიური დასკვნები შემუშავდებოდა. ახალი დასკვნის საფუძველზე, ზედამხედველობის სამსახურის მეთვალყურეობით, ადგილზე მიმდინარეობს კლდის გამაგრებითი სამუშაოები. თბილისის მერიის ინიციატივით, შესაბამისი უწყებების წარმომადგენლებსა და ექსპერტებთან ერთად დაიგეგმა მოსახლეობასთან საინფორმაციო შეხვედრა, ახალი გეოლოგიური დასკვნების მიხედვით შესასრულებელი სამუშაოების გაცნობის მიზნით“, - აცხადებენ მერიაში.
„რადიო თავისუფლების“ მიერ გავრცელებული ინფორმაციით, გუშინ გვიან ღამით, მთაწმინდაზე მშენებლობის გამო, კლდე კიდევ ერთხელ ჩამოინგრა.
მთაწმინდაზე, ყიფიანის ქუჩაზე, მამა დავითის ეკლესიის მიმდებარე ტერიტორიაზე კლდის მასა მიმდინარე წლის მაისში ჩამოიშალა. შემთხვევის შედეგად არავინ დაშავებულა. აღნიშნულ ადგილზე კომპანია სამშენებლო სამუშაოებს აწარმოებდა.
