„[პატრიარქი] არის ბრძენი ადამიანი და მას აქვს ყოველთვის სწორი პოზიცია იმ საკითხებთან დაკავშირებით, რომლებიც ეხება ჩვენს ქვეყანაში მიმდინარე პროცესებს" - ამის შესახებ კანაფის კანონპროექტზე საუბრის დროს დღეს პარლამენტის თავმჯდომარემ ირაკლი კობახიძემ განაცხადა.
მისი თქმით, მმართველმა გუნდმა კანონპროექტის შესახებ საპატრიარქოსთან შეხვედრა გუშინ გამართა, სადაც „ძალიან კარგი საუბარი" შედგა.
„პატრიარქი არის არა მხოლოდ ჩვენი სულიერი ლიდერი და ეკლესიის ხელმძღვანელი, არამედ ის არის ბრძენი ადამიანი და მას აქვს ყოველთვის სწორი პოზიცია იმ საკითხებთან დაკავშირებით, რომლებიც ეხება ჩვენს ქვეყანაში მიმდინარე პროცესებს. აქედან გამომდინარე, აუცილებლად მოვუსმენთ როგორც საზოგადოებას, ისე ეკლესიას, პატრიარქს და ამის საფუძველზე მივიღებთ გადაწყვეტილებას.
შეჩერებულია კანონპროექტის განხილვა და დავიწყებთ ძალიან აქტიურ კონსულტაციებს ყველასთან იმისათვის, რომ გავაცნოთ პირველ რიგში საზოგადოებას კანონპროექტის შინაარსი. ვუთხრათ საზოგადოებას ის, რასაც არასწორად ეუბნებოდნენ ჩვენი ოპონენტები, რომ აქ არც ერთ შემთხვევაში არ არის საუბარი ნარკოტიკების წარმოებასა და რეალიზაციაზე. ეს არის მკაფიოდ გამოსაკვეთი, რადგან საზოგადოებას დღეს სხვა რამე ჰგონია" - თქვა კობახიძემ.
გუშინ კანაფის კანონპროექტს პატრიარქი გამოეხმაურა და განაცხადა, რომ „არანაკლებად შესტკივა გული სამშობლოსათვის ჩვენს ხელისუფლებას".
„ჩემი აზრით, მთავრობამ უნდა აიღოს პასუხსიმგებლობა და გააკონტროლოს მდგომარეობა. კერძო სექტორში არ უნდა გადავიდეს ეს დარგი", - თქვა პატრიარქმა.
