მიზანშეწონილია, იცოდე, შენს კარიერას რა ბედი ელოდება ერთი-ორი წლით ადრე, - იუსტიციის უმაღლესი საბჭოს თავმჯდომარის მოვალეობის შემსრულებელი გიორგი მიქაუტაძე საბჭოს წევრის, ნაზი ჯანეზაშვილის განცხადებას გამოეხმაურა.
როგორც ჯანეზაშვილი აცხადებს, „მიქაუტაძე ცდილობს, გამოიყენოს ესოდენ გავლენიანი მდგომარეობა და პრივილეგირებულად მოისხას მოსამართლის მანტია უვადოდ, ანუ, პოტენციურად, იგი მოსამართლე იქნება 2047 წლამდე“.
გიორგი მიქაუტაძის თქმით, არაფერია იმ საკითხში უცნაური, რომ ის ცდილობს, მიიღოს მოსამართლეთა უვადოდ განმწესების კონკურსში მონაწილეობა.
„ის, რომ უვადოდ მსურს გავხდე მოსამართლე, ეს ნორმალურია. 10-წლიანი ვადა ნელ-ნელა იწურება და მაქვს სურვილი, რომ გავაგრძელო ჩემი კარიერა სასამართლო სისტემაში. მე ვარ საქალაქო სასამართლოს მოსამართლე და მაქვს პრეტენზია რომ გადავინიშნო მოსამართლედ უვადოდ. ამის ერთადერთი საშუალება არის კონკურსში მონაწილეობა. მიზანშეწონილია, იცოდე, შენს კარიერას რა ბედი ელის ერთი-ორი წლით ადრე", - განაცხადა გიორგი მიქაუტაძემ.
იუსტიციის საბჭოს თავმჯდომარის მოვალეობის შემსრულებელი ნაზი ჯანეზაშვილის სხვა ბრალდებებსაც გამოეხმაურა .
„2016 წლის ამბავი ახალი ნამდვილად არ არის, ვგულისხმობ ხაჭაპურიძის და ხაჩიძის საქმეს. ყოველ ჯერზე, როდესაც დასჭირდებათ „შავი კამპანიის“ აგორება, იხსენებენ ამ საქმეს. საკითხი შეეხებოდა სამართალდარღვევის საქმეს, რომელშიც ეს პირები (ხაჭაპურიძე და ხაჩიძე) მონაწილეობდნენ. ამაზე განაწყენებულები დამესხნენ თავს, რასაც კანონისმიერი რეაგირება მოჰყვა ჩემი მხრიდან. ლტოლვილის სტატუსი ბევრ მოქალაქეს აქვს და ამით არაფერი დასტურდება. რაც შეეხება მოსამართლე ხვიჩა კიკილაშვილის საქმეს, იუსტიციის საბჭოში ამ საკითხის განხილვისას მე მონაწილეობა არ მიმიღია", - განაცხადა გიორგი მიქაუტაძემ.
