ერთნაირსქესიანთა ქორწინების კონსტიტუციით აკრძალვის საკითხზე რუმინეთში რეფერენდუმი ჩაიშალა, რადგან ხმის მისაცემად მოსახლეობის მხოლოდ 20,4% გამოცხადდა. რეფერენდუმისთვის მოსახლეობის მინიმუმ 30%-იანი აქტივობაა საჭირო.
რეფერენდუმზე უნდა გადაწყვეტილიყო, სურს თუ არა მოსახლეობას ქორწინების მხოლოდ ქალისა და მამაკაცის კავშირად განსაზღვრა.
თუმცა, პარასკევს გამოქვეყნებული გამოკითხვის შედეგების თანახმად, ცვლილებას მხარს მოსახლეობის 90% უჭერდა.
„კოალიცია ოჯახისთვის" პრეზიდენტმა, მიჰაილ გეორგიუმ რეფერენდუმამდე BBC-ის უთხრა, რომ ისინი კონსტიტუციის დონეზე ქორწინების დეფინიციის, როგორც მხოლოდ ქალისა და მამაკაცის კავშირის დაცვას ცდილობდნენ.
პრაქტიკაში რეფერენდუმის შედეგები ერთნაირსქესიანი წყვილებისთვის ბევრს არაფერს შეცვლის, რადგან ქვეყანაში ერთნაირსქესიანთა ქორწინება ან სამოქალაქო პარტნიორობა არ არის აღიარებული.
ოპოზიციურმა პარტიამ, „რუმინეთის გადარჩენის კავშირმა", რომელიც რეფერენდუმის წინააღმდეგ გამოდიოდა, ხელისუფლებას გადადგომისკენ მოუწოდა 40 მილიონი ევროს გაფლანგვისთვის. მმართველი სოციალ-დემოკრატების პარტია რეფერენდუმს მხარს უჭერდა.
_____
რეფერენდუმის გზით ერთნაირსქსიანთა ქორწინების აკრძალვის საკითხი საქართველოშიც განიხილებოდა. თუმცა, „ქართული ოცნების" ინიციატივითა და მხარდაჭერით, ქორწინება, როგორც მხოლოდ ქალისა და მამაკაცის კავშირი კონსტიტუციაში რეფერენდუმის გარეშე აისახა.
