შემოსავლების სამსახურმა „შავი ზღვის უნივერსიტეტის“ წინააღმდეგ სარჩელი სასამართლოდან გაიტანა. რაც იმას ნიშნავს, რომ უნივერსიტეტის ქონებას ყადაღა მოეხსნა.
როგორც დღეს საქალაქო სასამართლოში გამართულ პროცესის დასრულების შემდგომ შემოსავლების სამსახურის წარმომადგენელმა განმარტა, შემოსავლების სამსახურმა მიიჩნია, რომ დღეის მდგომარეობით დავის გაგრძელების კანონიერი ინტერესი არ არსებობს.
„შესაბამისად, მივიღეთ გადაწყვეტილება სარჩელის გამოხმობის შესახებ, თუმცა ეს არ გულისხმობს სამოქალაქო საპროცესო კოდექსის თანახმად, სარჩელზე უარის თქმას. შესაბამისად, დღეის მდომარეობით, გადამხდელის ბარათზე არსებული ზედმეტობის გათვალისწინებით, მიღებულია შესაბამისი გადაწყვეტილება“,- განაცხადა შემოსავლების სამსახურის წარმომადგენელმა.
აღნიშნული გადაწყვეტილება შემოსავლების სამსახურმა მას შემდეგ მიიღო, რაც „შავი ზღვის უნივერსიტეტმა“ 735 000 ლარი გადაიხადა და ამის დამადასტურებელი დოკუმენტაციაც წარმოადგინა. შემოსავლების სამსახურმა წინა პროცესზე ითხოვა ორკვირიანი ვადა, რათა გადაეწყვიტა, გაიწვევდა თუ არა სასამართლოდან სარჩელს.
735 000 ლარი, რომელსაც „შავი ზღვის საერთაშორისო უნივერსიტეტს“ შემოსავლების სამსახური ედავებოდა, IBSU-ს ადმინისტრაციამ მიმდინარე წლის 27 აგვისტოს გადაიხადა.
