„გაუგებარია, რას აკეთებს „ქართუ“. საუბარია მხოლოდ იმ დავალიანებაზე, რომელიც 2000 ლარამდეა. ზოგადად, უიმედო სესხების ჩამოწერას ბანკები ყოველწლიურად ახდენდნენ", - ეროვნული ბანკის ყოფილი პრეზიდენტი, ფრაქცია „ნაციონალური მოძრაობის“ თავმჯდომარე რომან გოცირიძე ვალების განულების შესახებ პრემიერ-მინისტრ მამუკა ბახტაძის ინიციატივას აფასებს.

გოცირიძემ მედიას კონკრეტული მონაცემები გააცნო: „შარშან 77 მილიონი უიმედო ვალი ჩამოეწერა, 2016 წელს - 55 მილიონი. კომერციულმა ბანკებმა დაახლოებით 600 მილიონი ლარის ოდენობის უიმედო ვალი ჩამოწერეს“.

გოცირიძის აზრით, „ქართუ ფონდი“ მილიარდ-ნახევარ ლარს არ გადაიხდის. ეს არის მორიგი სატყუარა, რომელიც მცირე ოდენობის, ფაქტობრივად, ისეთ სესხებზეა საუბარი, რომელიც არასდროს არ იქნებოდა ბანკებისთვის დაბრუნებული და ბანკები მის რესტრუქტურიზაციას ისედაც აკეთებდნენ.

„რომ არ ყოფილიყო მეორე ტური, იქნებოდა ასეთი ინიციატივა? რომ არ ყოფილიყო მიხეილ სააკაშვილის გუშინდელი მიმართვა, იქნებოდა ასეთი ინიციატივა? როდესაც [სააკაშვილი] იქ არის, ამას აკეთებს, აქ რომ ჩამოვა რას გააკეთებს?!" - აცხადებს გოცირიძე.