ევროპის საბჭოს საპარლამენტო ასამბლეის (PACE), ევროპარლამენტის (EP), ეუთოს (OSCE), დემოკრატიული ინსტიტუტებისა და ადამიანის უფლებების ოფისისა (ODIHR) და ეუთოს საპარლამენტო ასამბლეის (OSCE PA), დამკვირვებლებმა არჩევნების მეორე ტურის შესახებ წინასწარი მოხსენება წარმოადგინეს.
წინასწარი დასკვნა არჩევნების პერიოდში მედიაგარემოსაც ეხება. მომხსენებლები მიიჩნევენ, რომ საზოგადოებრივმა მაუწყებელმა წარმოაჩინა მკვეთრად მიკერძოებული პოზიცია ოპოზიციური ძალის წინააღმდეგ.
სადამკვირვებლო მისიის წინასწარ დაკსვნაში წერია, რომ „საზოგადოებრივმა მაუწყებელმა არ შეასრულა სარედაქციო პოლიტიკის დამოუკიდებლობისა და მიუკერძოებლობის ვალდებულება“.
„საზოგადოებრივმა მაუწყებელმა წარმოაჩინა მკვეთრად მიკერძოებული პოზიცია ოპოზიციური ძალის წინააღმდეგ. თავის გადაცემებში არ შეასრულა სარედაქციო პოლიტიკის დამოუკიდებლობის, სამართლიანობისა და მიუკერძოებლობის ვალდებულება, რაც ეწინააღმდეგება საერთაშორისო სტანდარტებს. კერძო მედიასაშუალებები კვლავ ინარჩუნებდნენ მკვეთრად პოლარიზებულ პოზიციას და რეპორტაჟებში ღიად წარმოაჩენდნენ მიკერძოებულობას. რამდენიმე მათგანმა მეორე ტურის წინ უფრო თამამად გააჟღერა თავისი პოლიტიკური პოზიცია“, - წერია საერთაშორისო დამკვირვებლების წინასწარ დასკვნაში.
საერთაშორისო დამკვირვებლების შეფასებით, საპრეზიდენტო არჩევნების მეორე ტური კონკურენტულ გარემოში ჩატარდა და კანდიდატებს შესაძლებლობა მიეცათ, თავისუფლად წარემართათ საარჩევნო კამპანია, თუმცა ერთი მხარე სარგებლობდა საფუძველსმოკლებული უპირატესობით.
