ეკა ბესელიამ ჟურნალისტებთან საუბრისას განაცხადა, რომ, თუ ივანიშვილის გვარს არ ახსენებს ყოველდღე, ეს არ ნიშნავს, რომ კრიტიკული პოზიცია არ აქვს.
„ივანიშვილის გვარს თუ არ ვახსენებ ზოგიერთი ოპოზიციონერივით დღეში ათჯერ და ამინდის ცვლილებასაც თუ არ დავუკავშირებ მის სახელს, არ ნიშნავს იმას, რომ კრიტიკული პოზიცია არ მაქვს. მე მაქვს ჩემი პოლიტიკური ეთიკა, ჩემი ლექსიკონი და არ მინდა, დავემსგავსო იმ ადამიანებს, რომლებიც არ მომწონდა. რომ არ ვხედავდე ჩემსა და პარტიის თავმჯდომარის პოზიციას შორის სხვაობას, მივიღებდი წასვლის თაობაზე ამ გადაწყვეტილებას?! იმ ადამიანებისგან კი არ წავედი, ვინც „ქართულ ოცნებას“ გზადაგზა შემოუერთდა, ზოგიერთი შემთხვევით და ზოგი იმ მიზნით, რომ პარლამენტში მოხვედრილიყვნენ, მე წავედი სწორედ მისი მთავარი დამფუძნებლისგან იმიტომ, რომ ჩვენი ხედვა ასცდა მთავარ კონცეპტუალურ და სახელმწიფო მნიშვნელობის საკითხებს, როგორიც მართლმსაჯულების რეფორმაა. ჩემი გადაწყვეტილება ჩემს დამოკიდებულებაზე მეტყველებს და ვერც შემდგომში მოისმენთ ჩემგან ლანძღვა-გინებას“, - განაცხადა ბესელიამ.
