სსიპ „სოციალური მომსახურების სააგენტოში“ დასაქმებული სოციალური მუშაკები დღეიდან გაფიცვას შეწყვეტენ. ისინი სამუშაო პროცესს უბრუნდებიან, თუმცა, სოცმუშაკთა საინიციატივო ჯგუფის განცხადებით, მოთხოვნათა ნაწილი კვლავ შეუსრულებელია და პრობლემების მოსაგვარებლად ბრძოლას განაგრძობენ.
სოციალურმა მუშაკებმა გაფიცვა 25 მარტს დაიწყეს. მას შემდეგ, რაც 20 მარტს მედიაციის ფარგლებში ჯანდაცვის მინისტრის მოადგილესა და სოციალურ მუშაკებს შორის შეხვედრა უშედეგოდ დასრულდა.
როგორც ერთ-ერთ აქციაზე „ლიბერალს“ საინიციატივო ჯგუფის წევრმა, სოფო ხვთისიაშვილმა უთხრა, მათ 20-ზე მეტი მოთხოვნა ჰქონდათ ჯანდაცვის სამინისტროსთან.
მათგან 6 მოთხოვნის შესრულებას სოცმუშაკები დაუყონებლივ მოითხოვდნენ, რადგან აღნიშნავდნენ, რომ რამდენიმე საკითხი მათი სამუშაო პირობების გასაუმჯობესებლად განსაკუთრებით მნიშვნელოვანი იყო.
გაფიცვის შემდეგ, 28 მარტს სოციალურ მუშაკებს ჯანმრთელობისა და სოციალური დაცვის მინისტრი დავით სერგეენკო შეხვდა. შეხვედრის დასრულების შემდეგ სოციალურმა მუშაკებმა განაცხადეს, რომ მინისტრთან მათი მოთხოვნების ნაწილზე შეთანხმდნენ, თუმცა ნაწილი კვლავ არ იყო გათვალისწინებული სერგეენკოს შეთავაზებულ გეგმაში.