„ჩემთვის ჩემი ქვეყანაა მთავარი“, - ასე უპასუხა მიხეილ სააკაშვილმა ნიკა გვარამიას კითხვას, მართალია თუ არა, რომ ის მზად იყო უარი ეთქვა ჩრდილოატლანტიკურ ალიანსში გაწევრიანებაზე და დაეტოვებინა საქართველოში რუსული ბაზები. ნიკა გვარამიამ მიხეილ სააკაშვილს თომა ჩაგელიშვილის დოკუმენტურ ფილმში ნათქვამი ფრაზა შეახსენა:
მიშამ ემპირიულად გადაამოწმა, რომ რუსოფილების იდეა (ტერიტორიები NATO-ს ნაცვლად) ზღაპარია - ნოდია
„თუ ტერიტორიებს მოგვცემთ ყველაფერზე უარს ვამბობთ, მათ შორის, NATO-ზეც კი. 2008 წლის დასაწყისში პირდაპირ ვუთხარი, NATO-ზეც უარს ვამბობ, ტერიტორიები დაგვიბრუნეთ, დავამყაროთ მშვიდობა", - თქვა სააკაშვილმა. „- ანუ თქვენ თანახმა იყავით ბაზების დატოვებაზეც და NATO-ზეც უარს ამბობდით ტერიტორიული მთლიანობის სანაცვლოდ?“ - მიმართა გვარამიამ ექსპრეზიდენტს, რასაც მიხეილ სააკაშვილი დაეთანხმა.
„ჩემთვის ჩემი ქვეყანაა მთავარი... ჩვენ მივიღეთ ის მემკვიდრეობა, რომელიც მივიღეთ. რუსები აქ იყვნენ და რომ არ გასულიყვნენ, პრინციპში, მათი გაყრა შეუძლებელიც იყო. ამიტომ ვეუბნებოდით“, - განაცხადა სააკაშვილმა.
მიხეილ სააკაშვილის თქმით, ეს საკითხი აქტუალური განსაკუთრებით დასავლეთის ზოგიერთი ქვეყნის მიერ კოსოვოს აღიარების შემდეგ გახდა. აქცენტი კი ამ შემთხვევაში აფხაზეთზე კეთდებოდა, რადგან მისი თქმით, „ცხინვალს ნელ-ნელა ისედაც ვიბრუნებდით“.
საქართველოს მესამე პრეზიდენტი გვარამიასთან ინტერვიუში ჰყვება, რომ ე.წ. „სამხრეთ ოსეთის მთავრობა“ სპეციალურად შექმნეს და დიმიტრი სანაკოევი, ყოფილი სეპარატისტი დანიშნეს, რომ ოსებისთვის ეჩვენებინათ, მათ საქართველოს იურისდიქციის ქვეშ შეეძლებოდათ თავიანთი მთავრობის ყოლა.
