ორგანიზაცია „კონსტიტუციის 42-ე მუხლის“ იურისტის, არჩილ ჩოფიკაშვილის განცხადებით, გურჯაანის რაიონის პოლიციაში პატიმარს სცემეს. ასევე მოხდა სისხლის სამართლის საქმის ფალსიფიკაცია. ჩოფიკაშვილის განცხადებით, შემთხვევა 2019 წლის 22 მარტს მოხდა, როდესაც თორნიკე ტურიაშვილი და უჩა ილაშვილი მდინარე ალაზნის აკრძალულ ტერიტორიაზე ნავით თევზაობდნენ. ამ დროს მათ გარემოს დაცვის ინსპექციის თანამშრომელმა, ბესიკ შუბითიძემ ცეცხლი გაუხსნა. 

მისი თქმით, იმ ადამიანს, რომელიც ბრაკონიერად იყო წარმოჩენილი დაახლოებით 5 ცეცხლნასროლი ჭრილობა აქვს მიყენებული ზურგის არეში.

„თუ ეს ადამიანი იყო თავდამსხმელი და გარემოს დაცვის თანამშრომელი შუბითიძე იცავდა თავს თავდამსმხელისგან, გამორიცხულია, ასეთ შემთხვევაში ბრაკონიერს ჰქონოდა ცეცხლსასროლი იარაღის ტყვიები ზურგის არეში“, - განაცხადა ჩოფიკაშვილმა.  

მისი თქმით, მეორე დაკავებულ უჩა ილაშვილს მთელი ღამის განმავლობაში პოლიციელები ცემით აიძულებდნენ, მიეცა მეგობრის საწინააღმდეგო ჩვენება,

„22 მარტს უკანონოდ მოთევზავე ორი პირი გარემოს დაცვის თანამშრომელებმა დააკავეს. თორნიკე ტურიაშვილს დაკავებისას 5 ცეცხლნასროლი დაზიანება ჰქონდა მიღებული. ამ ფაქტის მიჩქმალვისთვის გარემოს დაცვის ინსპექციის თანამშრომლებმა დადგეს სცენა, თითქოს პირველად ბრაკონიერმა ესროლა თოფი გარემოს დაცვის ინსპექციის თანამშრომელს, თუმცა არც ერთ გამომძიებელს არ დაუსვამს კითხვა, თუ რატომ ჰქონდა ტყვიების უმეტესობა დაკავებულს ზურგის არეში მოხვედრილი. 

მეორე დაკავებულ უჩა ილაშვილს მთელი ღამის განმავლობაში პოლიციელები ცემით აიძულებდნენ, მიეცა მეგობრის საწინააღმდეგო ჩვენება, თუმცა უშედეგო მცდელობის შემდეგ ადმინისტრაციული სამართალდარღვევის 173-ე მუხლით შეუდგინეს დაკავების ოქმი და ყვარლის დროებითი განთავსების იზოლატორში გადაიყვანეს.

სწორედ, დროებითი განთავსების იზოლატორის თანამშრომლების დროული რეაგირების შედეგად დაფიქსირდა სხვადასხვა დაზიანება ილაშვილს სხეულზე. მოგვიანებით დაკავებულები სასამართლომ გაფრთხილების საფუძველზე გაათავისუფლა“, - ნათქვამია ორგანიზაციის მიერ გავრცელებულ განცხადებაში. 

ჩოფიკაშილის თქმით, მისთვის უცნობია, თუ რატომ განაგრძობენ ის პოლიციელები მუშაობას, ვისი იდენტიფიცირებაც მოახდინა უჩა ინაშვილმა და ამის შესახებ აცნობა დაკითხვის დროს პროკურატურას. ჩოფიკაშვილის თქმით, ესენი არიან: პოლიციის უფროსის მოადგილე ბექა ახალაური და ერთ-ერთი პოლიციელი ალექსანდრე შაგიაშვილი. 

ჩოფიკაშვილის თქმით, ორგანიზაცია მოითხოვს, გამოძიების დასრულებამდე ეს პოლიციელები დროებით  გათავისუფლდნენ სამსახურიდან. ასევე, მისი თქმით, სამსახურიდან უნდა გათავისუფლდეს გარემოს დაცვის თანამშრომელი შუბითიძე. 

პატიმრის შესაძლო ცემა გურჯაანის პოლიციის განყოფილებაში