საქართველოს საპატრიარქომ 7 მარტს წერილით მიმართა უზენაეს სასამართლოს, „ციანიდის საქმეზე" საქმის მასალების გასაჯაროებისა და გრიფით „საიდუმლოს“ მოხსნის შესახებ. 

საპატრიარქო უზენაეს სასამართლოს ე.წ. ციანიდის საქმეზე დოკუმენტების გასაჯაროებას სთხოვს

უზენაეს სასამართლოში წერილის საპასუხოდ ამბობენ, რომ  გიორგი მამალაძის საქმეს გრიფით „საიდუმლო“ არ ადევს.

„აღნიშნულ საქმეზე საბოლოო გადაწყვეტილება უზენაესმა სასამართლომ მიიღო 2018 წლის 1 აგვისტოს. შესაბამისად, დამთავრდა საქმის წარმოება და იგივე გადაეგზავნა თბილისის სააპელაციო სასამართლოს, რომელმაც საქმე შესანახად გადასცა თბილისის საქალაქო სასამართლოს, სადაც ამჟამად ინახება.

მოქმედი საპროცესო კანონმდებლობის მიხედვით, სისხლის სამართლის საქმის მასალებზე ხელი მიუწვდებათ მხოლოდ მხარეებს (ბრალდების და დაცვის მხარეს). ამ საქმეზე სასამართლო სხდომები პირველ და მეორე ინსტანციის სასამართლოში იყო დახურული. რაც შეეხება საქართველოს უზენაეს სასამართლოს, საქმე განხილულ იქნა ზეპირი მოსმენის გარეშე და მიღებული საბოლოო გადაწყვეტილება  (განჩინება) საჯაროა, რისი მოძიებაც შესაძლებელია უზენაესი სასამართლოს ვებგვერდზე, "- ნათქვამია უზენესი სასამართლოს წერილში, რომელიც საპატრიარქოს გაეგზავნა.