„პატრიოტთა ალიანსის“ დეპუტატმა, ემზარ კვიციანმა იურიდიულ საკითხთა კომიტეტის სხდომაზე განაცხადა, რომ მოსამართლეობის კანდიდატის კეთილსინდისიერება რომ დავინახოთ, მისი წარსული უნდა ვიცოდეთ.

ეკა ბესელიას კანონპროექტს მოსამართლეებთან დაკავშირებით იურიდიულმა კომიტეტმა მხარი არ დაუჭირა

„მე ვარ ის ადამიანი, რომელმაც გამოვიარე რეპრესიები სწორედ ამ მოსამართლეების ხელში. ბუნებრივია, მაქვს პროტესტი ამ მოსამართლეებთან დაკავშირებით. საქართველოში მაღლა ქვა რომ ისროლო, ქვემოთ იურისტს მოხვდება. კეთილსინდისიერი იურისტები არიან მოსაძებნნი იმისათვის, რომ უზენაესი სასამართლოს მოსამართლეები იყვნენ. 

აუცილებელია, მოსამართლეებმა გაიარონ ფილტრი. სწორედ ის ფილტრი, რომელსაც ეკა ბესელია გვთავაზობს. კეთილსინდისიერების გარეშე, მოსამართლე არ შეიძლება, რომ დაინიშნოს. ამ კეთილსინდისიერებას კი რითი ვხვდებით? წარსული უნდა ვიცოდეთ მისი. თუ მომავალზეა საუბარი, მაშინ ლელა კაკულიას ტესტი უნდა გაიარონ“, - განაცხადა ემზარ კვიციანმა. 

ეკა ბესელიას მიერ მომზადებულ კანონპროექტს უზენაესი სასამართლოს მოსამართლეების არჩევის წესთან დაკავშირებით იურიდიულ საკითხთა კომიტეტმა მხარი არ დაუჭირა. კენჭისყრის შედეგების მიხედვით, 3 მომხრე იყო,  5 წინააღმდეგი. 

რეგლამენტის თანახმად,  კომიტეტის უარყოფითი გადაწყვეტილების მიუხედავად, საკანონმდებლო ინიციატივა განსახილველად პლენარულ სხდომაზე პირველი მოსმენით მაინც გავა.