17 აპრილს თბილისის საქალაქო სასამართლოს მოსამართლემ, გიორგი არევაძემ ნაციონალისტური ჯგუფების 5 წევრი, რომლებსაც ხულიგნობა და რასობრივი დისკრიმინაცია ედებოდათ ბრალად, უდანაშაულოდ ცნო.

„ქართული ძალისა“ და რამდენიმე სხვა ნაციონალისტური ჯგუფის 12 წევრი პოლიციამ 2016 წლის 27 სექტემბერს, აღმაშენებლის გამზირზე სოხუმის დაცემის დღისადმი მიძღვნილ მსვლელობაზე დააკავა.

შსს-მ 27 სექტემბერსვე გაავრცელა ინფორმაცია, რომ დააკავეს „ქართული ძალის“ აქტივისტები, რომლებმაც თბილისში არასანქცირებული მსვლელობა გამართეს გმირთა მოედნიდან მეტროსადგურ „მარჯანიშვილის“ მიმართულებით.

„მსვლელობის მონაწილეები გამოირჩეოდნენ განსაკუთრებული აგრესიით, შეურაცხყოფას აყენებდნენ მოქალაქეებს, ისროდნენ მაშხალებს სავაჭრო ობიექტებსა და კაფეებში, აზიანებდნენ წარწერებსა და ბანერებს“, - ნათქვამია 2016 წელს შსს-ს გავრცელებულ განცხადებაში.

სისხლის სამართლის საქმე ხულიგნობისა და რასობრივი დისკრიმინაციის ბრალდებით წარიმართა, რაც 4-დან 7 წლამდე პატიმრობას ითვალისწინებს.

12 დაკავებულიდან 7 არასრულწლოვანი იყო და მათი საქმე სასამართლომ ცალკე განიხილა. „ქართული ძალის“ ლიდერისა და ერთ-ერთი დაკავებულის, ნიკოლოზ ბურნაძის ადვოკატის თქმით, დაახლოებით ერთი თვის წინ სასამართლომ შვიდივე არასრულწლოვანი გაამართლა, ახლა კი დარჩენილი 5 ბრალდებულიც უდანაშაულოდ ცნო.

გელა ნიკოლაიშვილმა „ლიბერალს“ უთხრა, რომ მოწმეებმა ვერ დაასახელეს კონკრეტული პირი, ვინც იმ დღეს აღმაშენებლის გამზირზე კანონი დაარღვია.

„პროცესზე გამოიკვეთა, რომ ვერც ერთმა მოწმემ - ვერც ე.წ. დაზარალებულებმა, ვერც უცხოელებმა, ვერც ქართველებმა ვერ ამოიცნეს კონკრეტული პიროვნება ამ ბრალდებულებიდან.

ზოგადად ლაპარაკობდნენ, რომ იყო ხმაური, ვიღაც შემოვარდა, ვიღაცამ შუშა ჩაამტვრია, ვიღაცამ ბანერი დააზიანა. მაგრამ ვინც იქ ესწრებოდა, ვერც ერთი მათგანი ვერ ამოიცნეს და აქედან გამომდინარე, მოსალოდნელი იყო, რომ მოსამართლეც გამამართლებელ განაჩენს გამოიტანადა“, - უთხრა „ლიბერალს“ გელა ნიკოლაიშვილმა.

ფოტო: ლიბერალიზმის სასწავლო ცენტრი/ლიკა თომაშვილი