„სამხრეთ ოსეთის პოზიცია უცვლელი რჩება - ქართულმა მხარემ უნდა აიღოს თავისი პოსტი", - ამის შესახებ ე.წ. სამხრეთ ოსეთის დე ფაქტო პრეზიდენტმა ანატოლი ბიბილოვმა განაცხადა.
„ტექნიკური შეხვედრა დასრულდა, საერთო აზრამდე ჯერ ვერ მივედით. მოლაპარაკებები უახლოეს დღეებში გაგრძელდება. უშიშროების კომიტეტს დაევალა პოსტის განთავსება, რომ ხალხმა ამ სოფელში თავი დაცულად იგრძნოს“, - განაცხადა ბიბილოვმა, რომელიც მოლაპარაკების ადგილზე ჩავიდა და სოფელ წნელში მოსახლეობას შეხვდა.
ხაშურის მუნიციპალიტეტის სოფელ ჩორჩანაში განვითარებული მოვლენების გამო, ქართულ მხარის, დე ფაქტო ცხინვალისა და რუსეთის საოკუპაციო ძალების წარმომადგენლებს შორის გამართული სპეციალური ტექნიკური შეხვედრა ცოტა ხნის წინ დასრულდა.
უსაფრთხოების საბჭოს აპარატის უფროსის კახა ქემოკლიძის თქმით, საგუშაგოს ლოკაციასთან დაკავშირებით საქართველოს ცენტრალურ მთავრობას და დე ფაქტო ხელისუფლებას აქვთ დიამეტრალურად განსხვავებული პოზიციები თუმცა, „მოცემულ მომენტში, საგუშაგო თავის ადგილას რჩება“.
