რა გააკეთა სალომე ზურაბიშვილმა პრეზიდენტობის სამ კვირაში - პრეზიდნეტის ანგარიში

„ლიბერალი"

ახალი ამბები / პოლიტიკა

11 იანვარი, 2019 17:58

საქართველოს პრეზიდენტი სალომე ზურაბიშვილი ჟურნალისტებს შეხვდა. კითხვებზე პასუხის გაცემამდე მან პრეზიდენტობის სამ კვირაში გაკეთებულ საქმეებზე ისაუბრა.

პრეზიდენტის თქმით, ის ნელ-ნელა ეჩვევა ორბელიანის სასახლეს. ასევე, როგორც მან აღნიშნა, პრეზიდენტის ადმინისტრაციაში დაწყებულია რეორგანიზაცია და გუნდის დაკომპლექტებით არის დაკავებული.

სალომე ზურაბიშვილმა განაცხადა, რომ ამ სამი კვირის განმავლობაში დაიწყო რეგიონებში გასვლა: „პირველი გასვლა იყო სამეგრელოში, ასევე ვიყავით ენგურის ხიდზე, რაც ჩემთვის ყველაზე ნიშანდობლივი იყო. რუხის საავადმყოფო დავათვალიერეთ, რომელიც ძალიან შთამბეჭდავია ერთის მხრივ, მაგრამ მეორეს მხრივ ჯერ კიდევ არაა ამოქმედებული".

ზურაბიშვილის თქმით, პრეზიდენტის ფონდში, რაც იყო დარჩენილი თანხა საახალწლო ღონისძიებებისთვის და სხვადასხვა საჭიროებებისთვის გამოიყენეს.

„ერთია, გამოვეცით რამდენიმე წიგნი - შშმ მიმოზა ცანავას ერთტომეული, გურამ დოჩანაშვილის წიგნის მესამე ტომი. ასევე ჟურნალი „ხიდი“, რომელიც არის ოკუპირებული ტერიტორიების და აფხაზ ძმებთან ნდობის აღდგენისთვის. 6 თვის გამოცემა დავაფინანსეთ. ასევე, ნიჭიერი ახალგაზრდა მუსიკოსისთვის შევისყიდეთ კლარნეტი, რომელიც სახელმწიფოს საკუთრებაში დარჩება, მაგრამ მფლობელობაში დროებით გადაეცემა ამ ნიჭიერ ახალგაზრდას, რომელსაც ეს სჭირდება. გადაცემის ცერემონიაზე მოვიწვევთ და ვუსურვებთ დიდ წარმატებას. ასევე ხელი მოვაწერე რამდენიმე კანონს", - განაცხადა სალომე ზურაბიშვილმა.