საქართველოსთვის უვიზო მიმოსვლის მინიჭების შესახებ გადაწყვეტილება ევროკავშირის ოფიციალურ ჟურნალში გამოქვეყნდა. პროცედურის თანახმად, ვიზალიბერალიზაცია ძალაში 20 დღეში შევა, შესაბამისად, 28 მარტს ამოქმედდება. 

ბრიუსელში საქართველოსთვის უვიზო მიმოსვლის მინიჭებას ხელს ოფიციალურად 1 მარტს მოაწერეს.

ევროპარლამენტმა საქართველოს ვიზალიბერალიზაციას მხარი 2 თებერვალს დაუჭირა. ევროკავშირის საბჭოს ოფიციალური მხარდაჭერა საქართველოს ვიზალიბერალიზაციამ 27 თებერვალს მიიღო, რითაც საქართველოს მოქალაქეებისთვის უვიზო მიმოსვლის მინიჭების პოლიტიკური მხარდაჭერის პროცესი დასრულდა. 

რაც შეეხება ტექნიკურ ნაწილს, 2015 წლის 18 დეკემბერს ევროკომისიამ რიგით მე-4 პროგრესანგარიში გამოაქვეყნა, რომელშიც ნათქვამი იყო, რომ საქართველო აკმაყოფილებდ ყველა ნიშნულს, რომელიც ვიზალიბერალიზაციის სამოქმედო გეგმის მეორე ნაწილში იყო მოცემული. ამით ვიზალიბერალიზაციის ტექნიკური მხარე დასრულდა.

როგორც ცნობილია, ვიზალიბერალიზაცია შეჩერების გამარტივებულ მექანიზმთან ერთად ამოქმედდება. ამდენად, ევროკავშირის ინსტიტუტებმა ვიზალიბერალიზაციის პარალელურად შეჩერბის მექანიზმის განახლებულ რეგულაციასაც დაუჭირეს მხარი. შესაბამისი ცვლილებაც ევროკავშირის ოფიციალურ ჟურნალში დღეს გამოქვეყნდა.