ჰააგაში მდებარე სისხლის სამართლის საერთაშორისო სასამართლოს დელეგაციასთან ერთად საქართველოში დაზარალებულთა დახმარების მიზნობრივი ფონდის წარმომადგენლები იმყოფებიან.
ფონდი სასამართლოსგან დამოუკიდებელი ინსტიტუტია, თუმცა საჭიროების შემთხვევაში სასამართლო მას კონკრეტული დაზარალებულის დახმარების თხოვნით მიმართავს.
„იმ შემთხვევაში, თუ პირს დაუმტკიცდება ბრალი და სასამართლო მასზე ზიანის ანაზღაურების ორდერს გასცემს, ხოლო ბრალდებულს კი არ შეეძლება თანხის გადახდა, მას ფონდი დაეხმარება“, - ამბობს ფონდის აღმასრულებელი დირექტორი პიტერ დე ბაანი, თბილისში ქართულ მედიასთან საუბარში.
პიტერ დე ბაანი გვიხსნის, რომ ფონდის საქმიანობა კონკრეტულ საქმეებში დაზარალებულთა დახმარებას ცდება. ფონდის მუშაობა გამოძიების დასრულებაზე არ არის დამოკიდებული, ამაზე ფონდის დირექტორთა საბჭო შეთანხმებულია. „იმისთვის, რომ დახმარება გავწიოთ, ჩვენ არ ველოდებით, როდის წარადგენენ პირს მართლმსაჯულების წინაშე“, - ამბობს დე ბაანი.
ფონდი მიზნად ისახავს, დაეხმაროს ადამიანებს, რომლებიც 2008 წლის 1 ივლისიდან 10 ოქტომბრამდე ომის დანაშაულის მსხვერპლი გახდა (დე ბაანის თქმით, ეს კრიტერიუმი დაზარალებული რომის სტატუტით არის განსაზღვრული), მიუხედავად იმისა, მუშაობდა თუ არა სასამართლო მათ საქმეებზე.
ჯერჯერობით უცნობია, როდის დაიწყებს ფონდი დახმარების გაწევას. როგორც დე ბაანი ამბობს, თავდაპირველად აუცილებელია დაზარალებულებთან და ხელისუფლებასთან შეხვედრა, იმისთვის რომ ფონდმა გაიგოს, რა ტიპის დახმარებაა საჭირო. საჭიროა თანხის მოძიებაc.
ფონდის აღმასრულებელი დირექტორის თქმით, მათ დაზარალებულებისთვის სამი სახის დახმარების გაწევა შეუძლიათ: სამედიცინო, ფსიქოლოგიური და სოციალურ-ეკონომიკური.
„ინფრასტრუქტურულ პროექტებში ვერ მივიღებთ მონაწილეობას. გზებსა და სახლებს ვერ ავაშენებთ“, - თქვა მან.
