საქართველოს რაგბის კავშირის სოციალური პროექტების მენეჯერისა და ვეტერანი მორაგბის, ნონო ანდღულაძის თქმით, საქართველოს რაგბის კავშირი გმობს ნებისმიერ დისკრიმინაციასა და ძალადობას.

ეს კომენტარი ნონო ანდღულაძემ „ლიბერალთან“ გურამ კაშიას განცხადების ირგვლივ  სოციალურ ქსელში გამოწვეული გამოხმაურების შემდეგ გააკეთა. ანდღულაძის თქმით, რაგბის კავშირი დიდი ხანია, ჩართულია ძალადობის წინააღმდეგ ბრძოლაში და მონაწილეობენ ოჯახში ძალადობის წინააღმდეგ მიმართულ კამპანიაში. მისივე თქმით, რაგბის კავშირი გმობს ძალადობას არა მხოლოდ გენდერული, არამედ ნებისმიერი ნიშნით. 

შეგახსენებთ, რომ რამდენიმე კვირის წინ ჰოლანდიის უმაღლეს ჩემპიონატში ყველა გუნდის კაპიტანმა ლგბტ დროშის სამკლავური მოირგო. მათ შორის იყო არნემის „ვიტესის“ ქართველი კაპიტანი გურამ კაშია. ჰოლანდიის პროფესიონალ ფეხბურთელთა გაერთიანების ხელმძღვანელის, დენი ჰესპის ინიციატივით, ეს იყო მრავალფეროვნებისა და ტოლერანტობისთვის მიძღვნილი კამპანია. ამ ფაქტს საზოგადოების ნაწილისგან ნეგატიური შეფასებები მოჰყვა Facebook-ზე, მათი კომენტარები ჰომოფობიურ შინაარსს შეიცავს. კაშია nos.nl-თან ინტერვიუში ამბობს, რომ არ ნანობს, რაც გააკეთა.