სახელმწიფო უსაფრთხოების სამსახურის წინააღმდეგ თემირლან მაჩალიკაშვილის მშობლების სარჩელზე გადაწყვეტილების სარეზოლუციო ნაწილს მოსამართლე 5 თებერვალს გამოაცხადებს.
„გაჟღერებული ტერმინოლოგია და გაჟღერებული ინფორმაციის მთლიანი კონტექსტი იძლევა საფუძველს, მივიჩნიოთ, რომ სახელმწიფო უსაფრთხოების სამსახურმა დაარღვია თემირლან მაჩალიკაშვილის უდანაშაულობის პრეზუმფცია. თუკი არსებობს ეჭვები, ეს ეჭვებიც საზოგადოებისთვის მიწოდებული და გაჟღერებული უნდა იყოს ეჭვების ფორმატში და არა მტკიცებით ფორმატში. ჩვენი თვალსაზრისით, ის სტანდარტები, რაც უდანაშაულობის პრეზუმფციასთანაა, დარღვეულია. 5 თებერვალს სასამართლო თავის პოზიციას გვეტყვის. თუ ჩვენს პოზიციას არ გაიზიარებს, ამ საქმეს შემდეგ ინსტანციებში მივყვებით", - განაცხადა ოჯახის ადვოკატმა, „ადამიანის უფლებების სწავლებისა და მონიტორინგის ცენტრის" იურისტმა, დავით ბერძულმა.
