„საკუთარი გუნდის წევრი ქალების ურჩობისთვის დასჯის ასეთი სასტიკი და არაადამიანური მეთოდი სიგნალია სხვებისთვისაც, რომ ჭკვიანად იყვნენ. ამჯერად, ასეთი ფორმით ქ-ნ ბესელიას იძულება ხდება, რომ დატოვოს ოცნება", - „ევროპული საქართველოს“ გენერალური მდივანი გიგი უგულავა პირადი ცხოვრების ამსახველი კადრების გავრცელებას facebook გვერდზე ეხმაურება.
„ამის შემდეგ ივანიშვილს იმედი აქვს, რომ სასურველ მოსამართლეებს გაიყვანს. აქ ის ძალიან ცდება. ეს მონა მონსტრები უზენაესის უვადო მოსამართლეები ვერ გახდებიან არა იმიტომ, რომ ბესელია-გედევანს არ უნდათ, არამედ იმიტომ, რომ საზოგადოების უკლებლივ ყველა ჯგუფია წინააღმდეგი, მათ შორის ოცნების უპირობო მომხრეებიც კი.
ამ საქმის საფუძვლიანი გამოძიებისა და დამნაშავეების დასჯის გარეშე, კადრების გავრცელებაზე პასუხისმგებლობა მთლიანად ივანიშვილისა და ამ ხელისუფლების კისერზე იქნება!“, - წერს გიგი უგულავა.
საპარლამენტო უმრავლესობის წევრის, დავით ჭიჭინაძის, თქმით, გუშინ, ღამით, დაიწყეს ერთ-ერთი პოლიტიკოსის პირადი ცხოვრების ამსახველი კადრების გავრცელება.
„ლიბერალი“ დაუკავშირდა შსს-ს. როგორც სამინისტროში განაცხადეს, საჯარო განცხადებაზე, რომელიც შესაძლოა შეიცავდეს დანაშაულის ნიშნებს, შინაგან საქმეთა სამინისტრო კანონით დადგენილ ფარგლებში მოახდენს სამართლებრივ რეაგირებას.
