ბარნოვზე ახალგაზრდა ქალის მკვლელობაში ბრალდებულ ვეფხია ბაქრაძეს წინასწარი პატიმრობა შეეფარდა. სასამართლო სხდომის დასრულების შემდეგ პროკურორმა იოსებ ხუციშვილმა საქმის დეტალებზე ისაუბრა. 

პროკურორის თქმით, მიმდინარეობს გამოძიება და მტკიცებულებების მოპოვების პროცესი. პროკურატურა მუშაობს იმ ვერსიაზეც, რომ ვეფხია ბაქრაძეს, კვალის დაფარვის მიზნით, სახლის გადაწვა სურდა. 

„სახლში აღმოჩენილია თხევადი ნივთიერება. ბრალდებულის განცხადებით ეს არის ბენზინი, თუმცა ექსპერტიზის დასკვნამდე არ შეგვიძლია, დაზუსტებით ვთქვათ. ბრალდებული ამბობს, რომ უნდოდა მოკლულის დედის ტანსაცმლის დაწვა.

ბრალდებული ემუქრებოდა მოკლულს. წინა დღითაც დაურეკა და დაემუქრა, რადგან მოკლული მათი ურთიერთობის წინააღმდეგი იყო და დედას ეუბნებოდა, რომ არ შერიგებოდა მოძალადეს. 

მკვლელობის შემდეგ როდესაც დედამ დაურეკა შვილს, ვეფხია ბაქრაძემ აიღო და უთხრა, რომ თაკო უკვე მიწაშია,“ - ამბობს პროკურორი. 

ახალგაზრდა ქალის მკვლელობისთვის ბრალდებულ ვეფხია ბაქრაძეს აღკვეთის ღონისძიების სახით საქალაქო სასამართლომ პატიმრობა შეუფარდა.

მოსამართლის განმარტებით, ბრალდებულის მხრიდან არაერთხელ ყოფილა ძალადობრივი აქტები გარდაცვილის დედის მიმართ და მიდრეკილია დანაშაულისკენ. მისივე შეფასებით, არსებობს მიმალვის, მტკიცებულებების განადგურებისა და მოწმეებზე ზეწოლის საფრთხე. 

დაკავებულის ადვოკატი ლევან მარსაგიშვილი გირაოს სახით 20 ათას ლარს მოითხოვდა.

13 აპრილს 25 წლის ქალი ბარნოვის ქუჩაზე მდებარე სახლში მოკლეს. მას მცირეწლოვანი შვილების თანდასწრებით დედის ყოფილმა მეუღლემ გამოჭრა ყელი. პირი მეორე დღეს დააკავეს.  მას ბრალი სისხლის სამართლის კოდექსის 11 პრიმა 109–ე მუხლით ედება, რაც ოჯახში ძალადობის ნიადაგზე ჩადენილ განზრახ მკვლელობას დამამძიმებელ გარემოებაში გულისხმობს.

ვეფხია ბაქრაძეს ბრალის დამტკიცების შემთხვევაში 16–დან 20 წლამდე ან უვადო პატიმრობა ემუქრება.

დაკავებული ოჯახში ძალადობის ბრალდებით მანამდეც იხდიდა სასჯელს, მაგრამ ის პრეზიდენტმა შეიწყალა. სასჯელი გაუნახევრდა და საპატიმრო დაწესებულება ვადაზე ადრე 2017 წლის 25 მაისს დატოვა.

ვეფხია ბაქრაძის სასამართლო სხდომა 6 ივლისს ჩაინიშნა. 

პროკურატურა ბარნოვზე მკვლელობაში ბრალდებულისათვის აღკვეთის ღონისძიებად პატიმრობას ითხოვს

რატომ დააკავეს ცოლზე ძალადობისთვის ვეფხვია ბაქრაძე ოთხი თვის შემდეგ

რატომ შეიწყალა ბარნოვზე 25 წლის ქალის მკვლელობაში ბრალდებული - პრეზიდენტის არგუმენტები​

ე.წ. უდოს კომისიაში ამბობენ, რომ ვეფხია ბაქრაძეზე იგივე დახასიათება ჰქონდათ, რაც პრეზიდენტს

ბარნოვზე მოკლული ქალის შვილების მდგომარეობას სოცსააგენტო შეისწავლის